Vinoway: sa resèssida de sos binos minores de Sardigna

In sa Mesa - Sa nova est betza de carchi chida, ma una cosa la podimus iscrìere cun tzertesa: custa informatzione meresset de intrare in custa rubrica. Semus faeddande de sa resèssida de sos binos otentos dae bides sardas minores in s'editzione de su 2023 de su "Vinoway Wine Selection". Una manifestatzione importante pro bingiateris e produtores de ampuddas de calidade, una manifestatzione chi onni annu si faghet in Puglia e chi ocannu ant fatu su 16 e su 17 de su mese de ledàmine coladu a Salice Salento, in provìntzia de Lecce.

Custa nova cheret faeddare de sa resèssida de sos binos sardos minores, o, pro lu pretzisare a manera ladina, de sos binos sardos otentos dae bides minores, bèvidas chi in Puglia ant fatu sa figura chi meressiant. Chistionamus, duncas, de su Nascu, de su Lacconargiu, de s'Arvesiniadu, de su Semidanu, de sa Malvasia de 'Osa e finas de sa Malvasia de Casteddu, de sa Granatza de Aristanis, de su Muristellu sardu, de su binu Cagnulari, de su Caricagiola, de su binu Barbera e de su Torbato.

Sa nova, duncas, est ca ocannu custas bèvidas ant leadu atentzione a sos binos sardos prus nòdidos, est a nàrrere a su Cannonau e a su Vermentinu, e finas a unos cantos binos italianos famados. Sa nova est finas ca custa resèssida sos binos sardos minores l'ant otenta in ocasione de una manifestatzione chi est tra sas prus importantes pro sos operadores de su mundu de su binu.

Ma faeddamus de nùmeros, pro ite sas tzifras sunt importantes: 300 sunt istadas sas etichetas chi ant leadu parte a sa manifestatzione. Sos espertos las ant dèvidas tastare e s'issèberu non est istadu fàtzile pro nudda; 12 imbetzes sunt sas ampuddas sardas chi funt istadas protagonistas de sa "masterclass" fata su 17 de ledàmine cun su tìtulu "I Tesori sconosciuti italiani: gli enologi raccontano i vitigni minori della Sardegna". Davide Gangi, Presidente de s'Assòtziu Vinoway at declaradu ca custa "masterclass" est istada un'atopu importante pro su mundu de su binu, un'apuntamentu netzessàriu pro fàghere cumprèndere ca sa Sardigna est una realidade vitivinìcola ispantosa e de importu.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22