6 isteddos a sa Sardigna dae sa "Guida Michelin"

In sa Mesa - Cunforma a sos àteros annos sa Sardigna lughet in sa "Guida Michelin" cun su "record" de isteddos: 5 ristorantes ant otentu cunfirma, in prus b'at una "new entry". Est su ristorante gadduresu "Fuoco Sacro" de San Pantaleo. Su ristorante s'agatat in intro de su "Petra Segreta Resort". Ghiat sa coghina de "Fuoco Sacro" su "chef" Luigi Bergeretto.

In sa "Guida Michelin" de su 2023, chi est lòmpida a sa de 68 editziones, b'est duncas una presèntzia importante de s'ìsula de Sardigna, pro ite su reconnoschimentu tocat 6 ristorantes in totu.

Sa cunfirma arribat pro Stefano Deidda de su "Corsaro" de Casteddu, chi intrat in sa ghia ruja pro su de sete annos consecutivos. Un'àtera cunfirma est sa de Italo Bassi, "chef" de su "Confusion Boutique Restaurant" de Poltu Celvu. Presentes in sa ghia finas sas tres "new entry" de s'annu coladu: su ristorante "Somu" de Altzaghèna - Baja Sardinia, ghiadu dae su "chef" Salvatore Camedda, su ristorante "Gusto By Sadler" de Santu Tiadoru de Uviddé, ghiadu dae su "chef" Claudio Sadler, e su ristorante "Fradis Minoris" de Nora, ghiadu dae su "chef" Francesco Stara. Tocat a sutalineare puru ca custos sunt totus ristorantes istajonales. Totus francu unu: semus faeddende de su ristorante casteddaju "Dal Corsaro", chi traballat totu s'annu.

Non est totu, pro ite b'at finas de faeddare de s'isteddu nou "Michelin", est a nàrrere de "Fuoco Sacro", chi est unu ristorante istajonale. Sa “new entry” est istada premiada pro su traballu fitianu e fatu cun amore dae totu sa cumarca, ma est istadu premiadu finas s'issèberu de impreare ingredientes de calidade primàrgia, elementu essentziale pro creare pratos chi si distinghent pro su nuscu e su sabore.

In prus de sos isteddos "Michelin", sa Sardigna at finas ristorantes "Bib Gourmand", est a nàrrere ca sunt intrados in sa ghia cun s'òmine a cara rìsida. Sunt ristorantes "Bib Gourmand" sa "new entry" "Trattoria Margherita" de Arborea e sos ristorantes chi ant otentu cunfirma, duncas su "Hub Ristorante Caffetteria" de Macumere, su ristorante "Su Gologone" de Ulìana, sos ristorantes casteddajos "Josto" e "Cucina.eat" e su ristorante "Coxinendi" de Seddori.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22