“Osterie d'Italia 2023”: premios pro sa Sardigna

In sa Mesa - Sa Sardigna si cunfirmat un'ìsula in ue si màndigat e si bufat bene. A lu nàrrere est sa "Guida Slow Food - Osterie d'Italia 2023". Ocannu puru su sussidiàriu de sos logos in ue si podet mandigare bene premiat sa Sardigna e lu faghet cun 13 reconnoschimentos.

S'editzione 2023 de "Osterie d'Italia" est istada presentada su 24 de su mese de ledàmine in su "Piccolo Teatro Strehler" de Milanu e si podet comporare giai dae su 26 coladu. Sa ghia 2023 at tra sos sìmbolos suos unu marcu nou: est su "Bere Bene", dedicadu "a un'issèberu de bèvidas alcòlicas e sena de alcol chi ant atentzione e personalidade: faeddamus de birras màstrinas, cocktail, sutzos etc", duncas non feti de binos.

Sas "Chiocciole" assignadas sunt chimbe: in Casteddu binchet sa "Locanda dei buoni e dei cattivi", in Ìtiri Cannedu su reconnoschimentu andat a "Su Recreu", mentras in Nùgoro su binchidore est "Il Rifugio"; in Nuxis su premiu est pro su ristorante "Letizia", in Sennariolo andat a "La Rosa dei Venti". Sos chi amus allistadu sunt totus nùmenes chi sunt istados giai mentovados s'annu coladu in sa ghia "Slow Food"

Sas "Bottiglie", imbetzes, sunt istadas assignadas a: "Il mosto" de Ázos, a "Ispinigoli" de Durgali, a "Abbamele" de Mamujada e a "Il portico" de Nùgoro.

No est totu. Su prèmiu ispetziale de sa "Selezione Bere Bene" est istadu assignadu a su ristorante "Ada" de Santu Sparau: "s'istera de Ada Pinna no at feti su paperi de sos binos - si leghet in sa motivatzione – ma at isseberadu de contare sos interpretes prus importantes de sa birra màstrina de Sardigna", est nàrrere sos chi nos contant unu "territòriu chi si cunfirmat ùnicu, ampru e interessante".

In "Osterie d'Italia 2023" de "Slow Food" sunt istadas isseberadas finas tres novidades: su ristorante "Abbamele" de Mamujada, s'agriturismu "Castel Doria" de Santa Maria Coghinas e sa "Tratto-macelleria Vivarelli" de Casteddu.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22