Caminende peri sas àrbures de olia in 23 biddas sardas

In sa Mesa - Arriora, Belchidda, Biddacidru, Biddaramosa, Bosa, Giàuni, Giba, Irbono, Iscroca, Ìtiri, Masainas, Nuxis, Patiolla, Samatzai, Santadi, Sèneghe, Serrenti, Siddi, Sini, Sossu, Uri, Ùsini, Ussaramanna. Sunt 23 sas biddas sardas chi custa domìniga, su 30 de ledàmine, ant a pigare parte a sa de ses diadas “natzionales” de sa manifestatzione “Camminata tra gli ulivi”. Bintitres de 177 in totu sas 18 regiones de s’istadu italianu.

A su chi narant sos organizadores, sa caminada est «un'ocasione pro torrare a istabilire unu ligàmene intre sos tzitadinos e sa terra issoro, unu modu pro fàghere connòschere su paesàgiu de una grandu tziviltade millenària e pro fàghere iscobèrrere a unu bene de apassionados de sa cultura enogastronòmica de su paisu nostru sos territòrios de orìgine de su produtu pro mèdiu de sas àrbores de olia e de sos òmines chi las custoint».

De custa manifestatzione nd’at faeddadu finamentas s’Assessora regionale de s’Agricultura Gabriella Murgia presentende·la in Casteddu: «Custa initziativa rapresentat sa mègius sìntesi intre sustenibilidade, respetu de sas richesas naturalìsticas e gherra contra a s’ispopulamentu de sas àreas internas».

In contu de ògiu, s’Assessora at naradu chi su sardu «nch’est lòmpidu a livellos artos de calidade conchistende cuotas de mercadu semper prus ampras e faghende·si apretziare dae consumadores e espertos. A su valore econòmicu de custu setore dinàmicu, bene rapresentadu dae produtos de primore, si nd’agiunghent àteros de importu vitale pro su sistema agrìculu e pro su mantenimentu de s'echilìbriu ambientale».

Sa manifestatzione est promòvida dae s’assòtziu “Città dell’olio”, ragrupamentu de 423 assotziados intre Comunos, Provìntzias, Càmeras de su cummèrtziu, indùstria e artisanadu, Parcos e Grupos de atzione locale impinnadu pro s'amparu de su territòriu de s’olia, pro sa valorizatzione de sos paesàgios suos e pro nche pònnere sas cussòrgias de sas tzitades de s'ògiu in su Registru natzionale de sos Paesàgios rurales istòricos de su Ministeru de sas Polìticas agrìculas.

Sas informatziones pro sos apuntamentos in Sardigna las agatamus inoghe: https://www.camminatatragliolivi.it/citta-e-itinerari/

Attività realizzata col contributo della Regione Sardegna - IMPRENTAS 2021-2022. LR 22/2018, art. 22