Sènnaru: sighint is manifestatziones chi afestant a sos 50 annos de su Muscadellu DOC de Sossu e de Sènnaru

In sa Mesa – In Sènnaru est totu prontu pro su 29 de su mese de argiolas, die chi at a afestare a su Muscadellu DOC de Sossu e de Sènnaru, unu binu de primore chi agradat meda a su paladu de sos istimadores.

“Aspettando calici” - est custu su nùmene de sa manifestatzione – at a èssere una ocasione importante pro promotzionare su binu produidu in Romàngia e peri su territòriu in ue lu faghent. Est gasi ca su 29 de argiolas chi at a bènnere binu e territòriu ant a èssere sos protagonistas de sa manifestazione.

Sos atopos dedicados a sos 50 annos de su Muscadellu de Sossu e Sènnaru fiant giai incumentzados in su mese de abrile coladu cun su cunvegnu "Sulle strade del Moscato", un'apuntamentu importante meda chi s'est isboligadu in su "Centro culturale Antonio Pazzola" de Sènnaru.

“Aspettando calici” rapresentat duncas su de duos atopos dedicados a su mesu sèculu de vida de su Muscadellu DOC de Sossu e Sènnaru. Sos apuntamentos de sa manifestatzione de argiolas ant a èssere unos cantos: dae unu “trekking” urbanu a sa bìsita a indonu a sas Domos de Janas; dae unu laboratòriu de tessìngiu finas a lòmpere a sas 21.00, cando in s'àrea de sa ex cava de cantone, at a èssere aprontada sa chena, est a nàrrere s'atopu prus importante de “Aspettando calici”. Su momentu dedicadu a su màndigu e a su binu, difatis, at a èssere su momentu de s'iscoberta de sos produtos tìpicos de sas biddas de Sossu e Sènnaru. Su Muscadellu DOC at a èssere su protagonista prus importante de s'apuntamentu enogastronòmicu. Un'apuntamentu de interessu, pro ite at a bìdere sa partetzipatzione de duos espertos: su chef Fabio Zago e s'enogastronomu Mario Sechi, chi ant a àere sa tarea de fàghere connòschere a sos bisitadores s'enogastronomia de sa Romàngia.

Sa chena est organizada dae sa comuna de Sènnaru paris cun sa “Confraternita del Moscato” e cun sas cantinas Fara, “Nuraghe Crabioni”, “Viticoltori di Romangia” e cantina “Sorso-Sennori”. Donant una manu de agiudu peri sas cantinas Sorres e Mode e s'”Istituto Alberghiero IPSIA”.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22