S’Assessora Murgia: «Luego s’Igp pro sas Seadas e su Dop pro su Pane Cocoi»

In sa Mesa - Pighende parte a unu seminàriu in contu de etzellèntzias locales e de innovatziones ecosostenìbiles, aprontadu su 29 de làmpadas in Sestu, s’Assessora regionale de s’Agricultura Gabriella Murgia at torradu a repìtere su pensu suo pro su chi pertocat sas produtziones cun marcu de orìgine. «In Sardigna – at naradu s’esponente de s’esecutivu – b’amus 42 produtos de calidade: 6 Dop e 2 Igp in su cumpartu agroalimentare e 33 Dop in su vitivinìculu».

Pro s’ocasione s’Assessora at annuntziadu finamentas sas istrutòrias «pro su reconnoschimentu de s’Igp pro sas Seadas e de su Dop pro su Pane Cocoi». De prus, faeddende de su potentziamentu intre produtos e logos, s’esponente de sa Giunta Solinas at mentovadu sos progetos de valorizatzione pro mèdiu de atziones coordinadas. Comintzende dae MenSarda. «Bi creimus meda a custa initziativa – at naradu – giunta in antis in pare cun s’Assòtziu de sos Comunes sardos pro promòvere sos refetòrios pùblicos a chilòmetru zeru, pro sensibilizare in contu de consumu dèghidu de sas produtziones agrìculas e pro contribuire a fraigare una cussèntzia colletiva de su patrimòniu agroalimentare locale cun interventos chi punnant a su mantenimentu de sa vitalidade, de s’identidade sotziale de sas àreas rurales, de s’eredidade culturale e de s’amparu de sos abitos. Est unu passu de importu conca a una sovranidade alimentare reale».

A bisu de Murgia «sa pandemia nd’at bogadu a campu sos puntos dèbiles de sa filera longa. Est pro custu chi sa regione est investende pro valorizare sos tzircùitos locales. Mescamente cun sa mesura 16.4 de su PSR 2014-2020 sustenimus sa cooperatzione intre aziendas agrìculas e àteros sugetos de sa filera agroalimentare. Cun custa mesura amus finantziadu belle 20 grupos de cooperatzione chi sunt interessende unas 400 aziendas pro unu totale de agiudos de 3 milliones de èuro o barda».

Attività realizzata col contributo della Regione Sardegna - IMPRENTAS 2021-2022. LR 22/2018, art. 22