Avisu a sas comunas pro s'adesione a "MENSarda-mense a km zero"

In sa Mesa – Su 27 de su mese de làmpadas coladu s'“ANCI Sardegna” at publicadu un'avisu importante chi pertocat su progetu "MENSarda-mense a km zero”. Faeddamus de un'avisu destinadu a sas comunas de Sardigna. S'avisu est unu passu netzessàriu pro pòdere realizare una retza de 50 comunas chi ant a pònnere in òpera su progetu etotu.

Ma ite est "MENSarda-mense a km zero"? Est unu progetu finanziadu dae s’Assessoradu regionale de s'Agricultura e Reforma agropastorale e ghiadu dae s' “Agenzia Laore Sardegna” paris cun s' “ANCI (est a nàrrere s' Associazione Nazionale dei Comuni Italiani) Sardegna”. Sa punna de "MENSarda-mense a km zero" est sa de promotzionare unu sistema in ue sos sogetos publicos e privados podent cumpartzire una caminera matessi. Custa caminera, difatis, pertocat a sa possibilidade de unu cumpartzimentu de regulamentos e protzessos amministrativos e massimamente pertocat a s'andala de valorizatzione de sas produtziones locales de calidade e de educatzione alimentare. In custu cuadru unu momentu importante at a èssere rappresentadu dae s'annestru asuba de sos temas de sas mensa a “km 0”.

Pro s'organizatzione de sos atopos netzessarios a s'isvilupu de su progetu etotu sas 50 comunas chi ant a addirire a sa retza s'ant a pòdere avantagiare de s'agiudu de s'“ANCI Sardegna” e de s'“Agenzia Laore”.

Sempermai, s'adesione de sas comunas pertocat mescamente a s'oganizatzione de sas mensas de s'iscola. Sa data ùrtima pro leare parte a su bandu e imbiare sa rechesta de partetzipatzione est fissada pro sas 12.00 de su 31 de su mese de argiolas 2022.

Tocat a pretzisare, però, ca cumente si podet lèghere in su giassu internet de sa Regione Autònoma de Sardigna, pro addirire a sa retza est netzessàriu fàghere un'àteru passu, est a nàrrere una delìbera de sa giunta comunale in ue si cumpartzint sos obietivos espressados in su “Manifesto – Amici di MENSarda” e peri si numenant sos referentes chi ant a sighire su progetu.
 

Attività realizzata col contributo della Regione Sardegna - IMPRENTAS 2021-2022. LR 22/2018, art. 22