Bator cantinas pro bator àndalas tra Marmilla e Sarcidanu

In sa Mesa - S'Idea de passigiare tra giuales, archeologia e arte, e finas sa de fàghere connòschere s'istòria e s'enogastronomia isulana, naschet dae sa conca de sos meres de sas cantinas Su'entu de Seddori, Lilliu de Soramanna, Olianas de Xrexrei e Soi de Nuragus.

Gosi, tra bìngias e istòria naschent "Is Camminantis". Unu nùmene importante, su chi ant isseberadu custas realidades produtivas de Sardigna, unu nùmene chi ammentat sos guturinos antigos de sa tramuda.

Cun "Is Camminantis" sas cantinas de Marmilla e Sarcidanu ant s'obietivu de promòvere su turismu de su binu.

Dae sas primas dies de su mese de trìulas su programma de "Is Camminantis" previdit un'àndala chi at a atraessare sos territòrios de sas cantinas chi amus numenadu cun unas cantas bisitas a sos logos in ue si faghet su binu. S'àndala at a èssere finas s'ocasione pro ammirare giassos archeològicos e edifìtzios istòricos. Su programma prevìdit una firmada in sa cantina Su'entu de Seddori. Una firmada interessante meda, chi at a fàghere iscobèrrere a su bisitadore sa bide de Muristellu declinada in bator versiones.

Dae sa cantina Su'entu su programma de "Is Camminantis" at a sighire in sa cantina Lilliu de Soramanna, in ue est istada recuperada una traditzione de sa Marmilla ligada a sa coltivatzione e a sa trasformatzione de s'àghina Malvasia. In Xrexrei sa bisita at a àere comente protagonista sa cantina Olianas, azienda ci at sa punna de su biointegrale. Dae inoghe s'at a lòmpere a Nuragus, nùmene de sa biddighedda e de sa bide autòctona de su logu. Una bide chi in s'azienda Soi est produida dae s'enòlogu Stefano Soi.

Su biàgiu de "Is Camminantis" at a lòmpere a su Casteddu de Seddori, a Su Nuraxi de Barumini, a Sa Jara Manna, a Geroni, Setzu e Tuili e a pustis a su Casteddu Aymerich de Làconi.

Sos organizadores ant ammanitzadu una "cartulina-passaportu" de timbrare in onni firmada. Cun bator timbros s'enoturista at a retzire un'ampulla de binu de onni cantina bisitada comente donu.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22