Sa punna de su Cocoi de Sardigna: èssere unu produtu DOP

In sa Mesa - Su Cocoi de Sardigna at sa punna de otènnere sa DOP, est a nàrrere sa “Denominazione di Origine Protetta”. In sas dies coladas, difatis, su Comitadu promotore at imbiadu a su "Ministero delle Politiche Agricole, Alimentari e Forestali" sa domanda ufitziale pro otènnere pròpiu sa "Denominazione di Origine Protetta".

S'istàntzia est istada sutascrita dae unu fiotu de maistros sardos de pane cun s'obietivu de otènnere unu reconnoschimentu de interessu mannu pro unu produtu alimentare importante pro su patrimòniu alimentare de s'ìsula. A manera crara su marcu de tutela "Denominazione di Origine Protetta" est finas un'istrumentu pretziosu pro sas impresas, ma peri pro sa tutela de sos chi lu còmporant.

Pro sas impresas totu su traballu fatu fintzas a como rapresentat su comintzu de unu caminu. Unu caminu chi at àpidu peri s'agiudu de s'"Agenzia Laore Sardegna", de s'"Agenzia Agris Sardegna", de su "CNA Agroalimentare Sardegna", de s'"Associazione Panificatori", de "Porto Conte Ricerche", de s'Universidade de sos Istùdios de Tàtari e de s'antropologa Alessandra Guigoni.

Unu traballu mannu, su chi est istadu fatu in sos annos colados pro pòdere lòmpere a afortiare s'istàntzia DOP arricada de unos cantos "dossier".

Cussu de su Cocoi de Sardigna est unu caminu de valorizatzione de sas matèrias primàrgias sardas. Unu caminu fatu finas de tasseddos ligados tra issos e chi tra issos faeddant. Unu caminu, duncas, fatu de unos cantos imprendidores chi ant detzìdidu de s'aunire a inghìriu de un'ispetzializade tra sas prus lichitosas de su patrimòniu gastronomicu de Sardigna. Cun su marcu DOP, difatis, su Cocoi at a èssere valorizadu, tuteladu e at a àere una promotzione comente si devet.

Faeddande de pane tocat finas a nàrrere ca su caminu de valorizatzione chi lu pertocat at sa punna de iscobèrrere siat su balore de su Cocoi siat su balore de s'àteru pane isulanu. Totu su pane sardu, difatis, espressat s'istòria culturale de Sardigna.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22