Presentada de su progetu “MenSarda – mense a km zero”

In sa Mesa - Cras, chenàbura 20 de su mese de maju 2022, at a èssere sa die de "MenSarda - mense a km zero", su progetu de sa Regione Autònoma de Sardigna chi at s'obietivu de promotzionare sa ristoratzione colletiva sustenìbili, chi si fundat subra s'impreu de produtziones agrìculas sardas e chi est orientada a su persighimentu de sa sovranidade alimentare de s'ìsula.

S'adòbiu "MenSarda - mense a km zero" s'at a isboligare in su T-Hotel de Casteddu (carrera dei Giudicati 66) e at a incumentzare a sas 11.00.

Su progetu de ristoratzione sustenìbili est finantziadu dae s'Assessoradu de s'Agricultura e Reforma agropastorale e est gestidu dae s'agentzia "Laore Sardegna" e dae s' “ANCI Sardegna” (“Associazione Nazionale Comuni Italiani”).

Ma ita previdit su progetu? Su progetu previdit una filera de atziones chi ant s'obietivu de promotzionare sas mensas pùblicas a chilòmetru zeru. No est totu. "MenSarda - mense a km zero" at finas un'àteru obietivu: contribuire a creare atinamentu e cussèntzia colletiva subra su patrimòniu agrualimentare locale. Sa finalidade est sa de mantènnere su balore e s'identidade sotziale de sos sartos.

Sas comunas de Sardigna, a manera coerente cun sas lìnias de indiritzu cherridas dae s'Ue, dae s'Istadu italianu e dae sa Regione Autònoma de Sardigna, ant a agatare in su progetu "MenSarda" un'oportunidade pro isvilupare unu progetu a manera partetzipada. Unu progetu chi siat finas aprontadu paris. Tocat a sutalinerare ca custa manera de traballare est importante pro dare un'acostamentu nou a sas polìticas locales e territoriales.

In s'addòbiu ant a faeddare s'Assessora de s'Agricultura e Reforma agropastorale Gabriella Murgia, su Presidente de s'ANCI Emiliano Deiana e su Commissàriu istraordinariu de "Laore Sardegna". Su pianu operativu "MenSarda" at a èssere acraridu dae Maria Grazia Manca e Andrea Felice Carlo Cerimele.

"MenSarda - mense a km zero" si podet sighire finas online in sa prataforma GoTo.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22