“Gustando Marceddì”: torrant sas licanzias coghinadas dae sos piscadores

In sa Mesa - A pustis de s'emergentzia de su COVID-19, domìniga 29 de su mese de maju 2022, in sa burgada de Marceddì s'at a isboligare sa de batòrdighi editziones de "Gustando Marceddì", est a nàrrere ca ant a torrare sas licanzias de pische coghinadas dae sos piscadores.

Sa rassigna gastronomica organizada dae sa "Pro loco" de Terraba, e ocannu finas dae sos pitzocos e sas pitzocas de sa leva 1972, est un'adòbiu nuscosu e de sabore, ma in su 2022 at a èssere finas un'adòbiu istòricu importante meda, pro ite previdit finas sa bisita a sa turre aragonesa.

Sa de su 2022 est pro su Presidente de sa "Pro Loco" de Terraba Pinuccio Diana "un'editzione isetada meda". Pro custa resone sa màchina organizativa s'abetat gente meda.

A coghinare ant a èssere sos piscadores paris a sos terrabesos e a sas terrabesas de sa leva de su 1972. Su “menu” previdit antipastos, primos e segundos pratos. Sas licanzias ant a èssere serbidas in cara de sas domos de sos piscadores. At a arricare sa festa gastronomica finas unu piscajolu in ue s'at a pòdere mandigare.

Sos tastos ant a incumentzare dae mesu die. A carignare su paladu ant a èssere retzetas comente sa burrida de Marceddì, ca no est sa matessi cosa de su prus famada burrida a sa casteddaja. Galu, s'at a pòdere mandigare pische frissu, mugheddu arrustu, purpu cun tàpara e olia, purpu cun patata e àteru meda. Onni pratu at a èssere acumpangiadu dae birdura, pane, abba, binu Muristellu e Vermentinu a manera rigorosa fatos dae sas cantinas terrabesas.

Sos chi ant a leare parte a "Gustando Marceddì" ant pòdere achistare su billete a manera dereta domìniga 29 de su mese de maju in su "stand" de sa "Pro Loco". Sos billetes ant unu prètziu de 8 èuros pro una persone, de 15 èuros pro duas persones e de 20 èuros pro tres persones. Sos bisitadores ant a retzire finas una mapa in ue ant a agatare sos logos de cunsigna de sos pratos chi s'ant a agatare in su "menu".

Attività realizzata col contributo della Regione Sardegna - IMPRENTAS 2021-2022. LR 22/2018, art. 22