"Culurgionis d'Ogliastra": unu produtu IGP de connòschere

In sa Mesa –  Sos "Culurgionis d'Ogliastra" sunt unu produtu IGP, acrònimu de "Indicazione Geografica Protetta". Custu imboligheddu de pasta fata in domo, prena cun patata cundida e serradu a ispighita, est una prenda culinària de Sardigna, unu produtu de primore chi at unu gustu licantzu e unu nuscu meravigiosu, chi faeddant de su territòriu de Ogiastra (regione chi incluit sas biddas de Àrthana, Barì, Baunei, Cardedu, Elini, Gàiru, Gelisuli, Irbono, Jersu, Lanusè, Loceri, Lotzorai, Osini, Foghesu, Seui, Talana, Tertenia, Tortolì, Triei, Ulassa, Orthullè, Ussassa, Biddamanna Strisàili), logu in ue, mancu a lu nàrrere, si faghent custos produtos tìpicos de sa gastronomia isulana.

De onni manera, tocat a pretzisare ca custa àrea de produtzione si perlongat peri a carchi comuna lacanàrgia chi faghet parte de sa provìntzia de Casteddu, est a nàrrere: Stersili, Sàdili e Scalepranu.

Ma comente sunt fatos sos culurgiones? Sa pasta de sos culurgiones est fata de sìmula, de podda, de sale, de abba e de un'ingrediente grassu, chi podet èssere ògiu de porcu, butiru o ògiu ermanu. Su prenìngiu, imbetzes, est fatu cun patata, un'ammisturu de casu (tra su casu isseberadu b'est comente ingrediente essentziale su casu aghedu) e de ògiu ermanu, o puru de ògiu de porcu o de ògiu de seu. Su prenìngiu podet èssere arrichidu cun menta, àgiu, afàbrica o chibudda.

Tirada sa pasta e fatu su prenìngiu, custu si ponet a partighedda in sa pasta segada a tundu, duncas tocat a la serrare a ispighita, unu tipu de serradura traditzionale fata a manu.

Sos "Culurgionis d'Ogliastra" si bendent in cunfetziones chi ant su marcu e una filera de informatziones chi serbint comente garantzia de s'orìgine e de s'identificatzione de su produtu etotu. Duncas, in sa cunfetzione devet èssere iscritu: "Culurgionis d'Ogliastra", custa denominatzione est sighida dae su mentovu IGP iscritu prus in grussu e dae su sìmbolu de s'"Unione Europea". Galu, si devent agatare: su nùmene de sa dita, s'indiritzu de s'azienda produtora, s'iscrita "con patate" o, a manera alternativa, s'iscrita "con fiocchi di patate". Custa iscrita mudat chi pro su prenìngiu s'impreat sa patata o sos frocos de patatas.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22