Su mele sardu in su pòdiu de su prèmiu Biomiel

In sa Mesa - Bonos resurtos pro su mele sardu biològicu in s’editzione 2022 de su prèmiu internatzionale “Biolmiel” organizadu in Matera cun sa collaboratzione de su Crea (Cosìgiu pro sa chirca in agricultura e s’anàlisi de s’economia agrària) de su Ministeru de sas Polìticas agrìculas.

Su cuncursu pro su mègius mele biològicu at interessadu unas cantas aziendas de s’àrea mediterrànea, carpàtzica e balcànica cun custos paisos: Grètzia, Islovàchia, Islovènia, Ispagna, Itàlia, Romania e Sèrbia.

Norantaduas sas medàllias intregadas ocannu, cun 13 chi lompent deretu a Sardigna. Prus chi non bona sa proa de s’azienda Terrantiga de Santu Sparau chi at otènnidu s’oro cun su mele de ocalitu, cunsideradu su mègius produti monoflor. Parte prus arta de su pòdiu finamentas pro su mele de lidone e bator sos segundos postos pro sos de arbutzu, de sudda, de archimissa e de iscoba. Duos sos oros finamentas pro su mele Eja de Nicola Cossu de Thiniscole (ocalitu e lidone). Brunzu pro s’azienda Barbagia de Antonia Puddu cun su millefiori.

A giuigare sos produtos una commissione internatzionale de espertos. «Est unu reconnoschimentu de importu – at naradu su diretore de Terrantiga Francesco Caboni – chi nos impuntzat a ispainare galu de prus sa cultura de su mele. Una cussèntzia semper prus manna dae parte de sos consumadores podet mòvere dae una alleàntzia istratègica cun su mundu de sa grandu coghina.

In su mele b’at biodiversidade, sustenibilidade e contivìgiu de su territòriu. Totu cantos ingredientes chi retzint sa mirada de sa sotziedade nostra oe». Pro sa matessi punna sos àteros produtores. Cossu, premiadu sa prima borta su 2018 conchistende sos giurados in contu de sabores, colores, nuscos, limpidesa, parpu e igiene, pràticat s’apicultura nòmade rispetende s’ecosistema comente «ùnica manera pro li garantire a su consumadore finale produtos de primore».

Attività realizzata col contributo della Regione Sardegna - IMPRENTAS 2021-2022. LR 22/2018, art. 22