Su “Carignano del Sulcis” conchistat su Vinitaly

In sa Mesa - Su “Carignano del Sulcis” conchistat su Vinitaly, manifestatzione importante e de interessu pro totu su mundu de sos bingiateris  chi s'est isboligada in sa regione Venetu dae su 10 a su 13 de su mese de abrile coladu.

In sa Fiera de Verona su nùmene de s'ìsula de Sardigna est boladu in artu. Sa Sardigna, difatis, est istada protagonista de sa manifestatzione internatzionale de su binu cun 101 produtores isulanus. Tocat peri a pretzisare ca 71 de custos produtores de binu si sunt agatados paris in su “stand” colletivu promòvidu dae sa Regione Autònoma de Sardigna pro faeddare de binu e de territòriu.

Ma faghimus carchi passu a dae segus. Est cosa nodida, difatis, ca sos binos de Sardigna sunt connoschidos in totu su mundu. Dae su Cannonau de Nùgoro a su Vermentinu de Gaddura, dae sa Crànnacia de Aristanis a su Carignanu de su Surcis, dae sa Malvasia de Bosa a sa Monica, dae su Muscadellu a su Nascu, sas ampuddas de Sardigna rapresentant binos de primore e conchistant siat su paladu siat su nasu.

Tocat finas a sutalineare ca sa produtzione de binos de calidade fatos in s'ìsula nostra, in die de oe at permìtidu a sa Sardigna de segudare resurtados mannos. In Sardigna, difatis, sunt unos cantos sos binos de primore.

Tra sos protagonistas mannos de su Vinitaly de Verona s'agatat su “Carignano del Sulcis”. Difatis, su Surcis, cun sa produtzione de binu sua, at otentu resurtados bonos meda. Tra sos binos chi ant fatu bolare in artu sa bandera de Sardigna agatamus su “Terre Brune 2018”, una bèvida produida dae sa “Cantina di Santadi”. Paris cun “Terre Brune 2018” agatamus peri “Arruga”, un'apudda de “Carignano del Sulcis DOC Superiore” chi est produida dae sa cantina “Sardus Pater” de Sant'Antiogu. Non est totu. Unu resurtadu bonu l'at otentu finas su Vermentinu de su Surcis, est a nàrrere su “Porto Pino IGT Galesa 2019”, unu binu biancu de sa “Cantina Mesa” de Arresi.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22