Sa Crannàcia de Aristanis faghet un'àteru gol

In sa Mesa - Sa Crannàcia de Aristanis non faddit una "partida" e faghet un'àteru gol. Difatis, in su "5Starwines-The book 2023" de "Vinitaly" de Verona est istadu premiadu su binu "Vernaccia di Oristano DOC Riserva" "Judikes".

Su binu biancu "Judikes", duncas, bolat in continente e batit a domo unu reconnoschimentu de importu mannu. Cun su puntègiu de 97 chentèsimos, custu binu est istadu identificadu dae sa "guida “Starwines-The book 2023" de Vinitaly comente binu de primore in sa categoria de sos biancos.

Ma faghimus unu passu in dae segus. In sas dies coladas Verona est istada su coro de sas fieras de tastos chi ant premiadu sos mègius binos in su cuncursu chi introduit a su "Vinitaly", sa manifestatzione de importu chi s'at a isboligare dae su 10 a su 13 de su mese de abrile.

Duncas, sa bide de Aristanis chi at 3.500 annos e prus de istòria, lompet in Itàlia e conchistat unu reconnoschimentu chi donat cuntentesa manna a totu su territòriu. Unu territòriu chi dae semper at dadu creèntzia a sa crannàcia, finas in sos annos sena ispera.

"Cun custu prèmiu - decrarat a ANSA Roberto Puggioni, enologu de sa 'Cantina Sociale della Vernaccia' - sighint sos aprovos pro custa prella rara de s'enologia mundiale", e - pretzisat - “in sos ùrtimos annos sos reconnoschimentos otentos dae sas cantinas de sa zona de Aristanis sunt medas e sunt sa cunfirma de canto siat ùnica custa bide.

Sos afestos fatos s'annu coladu in s'"Ecomuseo della Vernaccia di Oristano" (afestos chi pertocànt a sos 50 annos dae sa primu DOC sarda) ant abertu sa ghenna de sa sorte a custu binu. Pròpiu su binu “Judikes” est istadu sorteadu pro su brìndisi finale.

De ogni manera sa 'Cantina Sociale della Vernaccia' at otentu peri àteros prèmios cun sos binos: "Juighissa", una crannàcia clàssica, e cun su binu "Terresinis", un'“IGT – Valle del Tirso”. Peri sas àteras realidades de Sardigna ant otentu unu nùmeru mannu de reconnoschimentos. Sos chi si sunt acurtziados a su puntègiu prus artu, est a nàrrere a su puntègiu otentu dae "Judikes", sunt: su "Cannonau di Sardegna doc Naniha 2019" de sas "Tenute Perdarubia" de Ogiastra, e su "Mandrolisai rosso doc 2020" de sa "Vitinicola Fradiles" de Atzara.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22