Cuncursu "Ercole Oleario": bator prèmios a sa Sardigna

In sa Mesa - Lompet a sa de trinta editziones su cuncursu umbru "Ercole Olivario". Su cuncursu est aprontadu dae s'"Unione Italiana delle Camere di Commercio, Industria, Artigianato e Agricoltura" cun sa collaboratzione de sa "Camera di Commercio dell'Umbria", de su "Ministero delle Politiche Agricole, Alimentari e Forestali", de su "Ministero dello Sviluppo Economico" e cun su s'amparu de "Unaprol Consorzio Olivicolo Italiano" e de "Italia Olivicola".

Custa manifestatzione dedicada a s'ògiu de calidade at premiadu sa Sardigna. Duncas, sas aziendas isulanas sunt tra sas protagonistas de s'importante cuncursu umbru dedicadu a sos ògios de primore.

Dae Perugia, difatis, sos ògios sardos batint a domo bator prèmios otentos in categorias diferentes. Sos binchidores de s'editzione de su 2022 sunt istados proclamados su 26 de su mese de martzu coladu in su "Centro Congressi della Camera di Commercio dell'Umbria Perugia".

Sos prèmios sunt istados assignados dae una giuria ghiada dae Alfredo Marasciulo e fata dae 16 tastadores professionistas. Sos tastadores sunt lòmpidos dae totus sas regiones italianas chi ant leadu parte a su cuncursu.

A triunfare in sa categoria "Dop Igp fruttato medio" est istadu s'ògiu "Fruttato verde Dop Sardegna" de s'azienda "Antonello Fois" de s'Alighera. In sa categoria "Extravergine fruttato leggero" sa Sardigna at leadu su primu postu gràtzias a s'ògiu "Lelais" de s'azienda de Laura Moretti de Ìtiri Cannedu. A cumandu de su pòdiu agatamus un'àteru ògiu de primore: s'"Iliò" de sa "Cooperativa Olivicoltori Oliena". S'ògiu de Ulìana binchet su primu prèmiu in sa categoria "Extravergine fruttato medio". Tra sos ògios de sa categoria "Dop /IGP Fruttato Intenso" artziat in su de duos iscaleris s'ògiu "Ispiritu Sardu", unu produtu de s'azienda Masoni Becciu de Valentina Deidda, produtora de Bidda de Cidru chi at otentu finas su mentovu de mèritu comente mègius impresa feminile.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22