Eletzionis e beni de sa Natzioni Sarda: s'anàlisi de ProgReS

“Non fàiri acòrdius cun is organizatzionis italianas, chi in Sardigna rapresentant sa longa manus de su tzentralismu istatali italianu”. Est custu su pentzu de is indipedentistas de Progetu Repùblica, un'idea làdina chi – comenti si ligit in nd-una nota de imprenta - “ est insertada […] in is documentus nostrus”.

Chini s'iscririt a ProgReS – pretzisat su comunicau –  “scit ca – in is eletzionis comunalis puru – su Partidu non previdit alleàntzias cun is organizatzionis italianas po regulamentu internu”.  Difatis, po podi pigai parti a is eletzionis comunalis, is iscritus de Progetu Repùblica ddu depint fàiri cun nd-una lista de partidu o cun nd-una lista natzionalista, sinuncas si podint candidai in nd-una lista cìvica innoia non nci siant nòminis de is pàrtidus italianus.

In is eletzionis passadas, su partidu indipendentista at elìgiu duus tesseraus: su Presidenti Natzionali Luigi Todde e s'ativista Gabrielli Cossu Cantarella.
Un'arresurtau positivu chi perou non firmat s'anàlisi fata in matèria eletorali de is indipendentistas. Po Progetu Repùblica, difatis, is cosas funt craras: “fatuvatu un'iaxi de votus indipendentistas dd'acabant atesu meda de cussus chi funt is interessus de su pòpulu sardu”. Funt votus chi non faint otenni nudda “si non s'arreconnoscimentu de èssiri bonus feti a betiri àcua a is partidus italianus”.

Mancai totugantus tengant su diritu de sighiri su caminu insoru, su partidu indipendentista pretzisat ca po lòmpiri a sa mancebatzioni natzionali “unas cantus isceras funt arruinosas po sa semida de Liberatzioni chi pertocat a totugantus”. Po custa arrexoni Progetu Repùblica si augurat ca in su benidori siat su beni de sa Natzioni Sarda a ghiai is determinus polìticus de s'indipendentismu.

Sa fotografia est de ariKasia