Is isperas de sa Corona de logu po is eletziones amministrativas de su 25 e 26 de santugaine

Sa Corona de Logu, assemblea de is amministradores locales indipendentistas, càstiat cun interessu mannu a is eletziones amministrativas imbenientes de su 25 e 26 de santugaine, cando prus de 150 Comunas sardas ant a seberare sìndigos e consigios comunales noos.Cun interessu mannu, pro primu ca sunt eletziones lìberas. Faina chi at a afortire s'ispìritu democràticu de su pòpulu nostru, comente nos ant ammustradu custas dies de campagna eletorale is dibatas intre listas e intre candidados. Pro segundu, ca in intro de is listas ddoe at candidadas/os indipendentistas. Candidadas/os chi punnant a intrare in is istitutziones locales pro promovere e pro defensare su deretu de is sardos a s'autodeterminatzione natzionale, cun s'obietivu ùrtimu chi nascat una Repùblica de Sardigna democràtica, pluralista e inclusiva. Sa Corona de Logu isperat chi siat elègidu a sa càrriga de sindiga/u e de consigera/i comunale su nùmeru prus artu de candidadas/os indipendentistas.

In custa manera amus a pòdere traballare paris a su fràigu de un'Ìstadu sardu soberanu, chi amus a conchistare cun s'impreu de is mèdios democràticos de votu, pro serrare su protzessu de àuto-cussèntzia chi pòngiat a meledare totu is sardos subra is pròpias raighinas e subra su pròpiu benidore. Est a nàrrere subra sa pròpia sorte. Custu est su sentidu prus fungudu chi sa Corona de logu bidet in is eletziones amministrativas imbenientes. Rapresentant s'ocasione pro meledare ancora subra is obietivos de libertade de sa comunidade sarda, pro bogarea campu ideas, progetos e interventos de sustàntzia chi agiuent su pòpulu sardu a cumprire cussos obietivos matessi. Sa Corona de Logu donat bonas uras a totu is candidadas/os e, cun su giogu democràticu, su recùperu, s'annoamentu, su raighinamentu de s'apartenèntzia personale de cadaunu a sa gente sarda. Unu pòpulu, un'ìsula, una Repùblica de Sardigna.