Sos binos estremados de sa “Vitivinicola Alberto Loi”

* Dae sa terra a sa butìllia * - S'agatat in Ogiàstra in sa biddighedda de Cardedu, una zona nodida pro sa produtzione de àghina Cannonau, tra sas prus famadas in Sardigna. Su nùmene suo est “Vitivinicola Alberto Loi” e est una realidade produtiva interessante, chi at un'istòria longa de otanta annos pagu prus o mancu.

Fundada dae Alberto Loi in sos annos Baranta de su Noighentos, dae bator inzènneros custa cantina e sas bìngias cosa sua produint binos estremados. Dae parte sua, Alberto, nàschidu dae una famìlia jersesa, dae cando fiat minoreddu at sempre connòschidu su traballu in bìngia; oe totu s'azienda – bìngias e cantina - sunt ghiadas dae sos fìgios e dae sos nebodes suos.

Sa “Vitivinicola Alberto Loi” est una cantina chi in sos primos annos de vida traballaiat feti àghina Cannonau, ma in die de oe allevat peri àteras ratzas de bides autòctonas: su Vermentinu, su Muristellu, su Nascu, su Muscadellu, su Monica e su Carignanu.

Sas bides sunt pastinadas intro de unu sartu de chimbanta ètaros, unu logu bellu meda insertadu tra su Gennargentu e su mare. Bisòngiat a nàrrere puru ca custa realidade produtiva at àteras duas tancas: una est in Castiadas e s'àtera s'agatat in Jersu. In sos sartos de Cardedu sos Loi coltivant Cannonau, Muristellu e Carignanu, mentres in Castiadas e Jersu agatamus sas bides de Vermentinu, Nuragus, Nascu, Muscadellu, Monica, Carignanu, Muristellu e Cagnulari.

Sa punna de sa “Vitivinicola Alberto Loi” est sa de aunire sa traditzione cun s'innovatzione in sa produtzione de sos binos suos.

Sos produtos finales de su traballu in su sartu e in sos impiantos de vinificatzione sunt unas cantas bèvidas ispantosas a marcu “Alberto Loi”. Sunt binos nieddos, biancos e finas rosados.

Tra sos Cannonau agatamus sos nieddos “Sa Mola”, “Cardedo”, “Alberto Loi – Riserva” e s'“Al” e unu Cannonau rosadu, su binu “Rosemonti”.

Sas ampuddas de “Sa Mola” costoint una bèvida chi at nuscos carcos e un'istrutura echilibrada; su “Cardedo” est una bèvida primorosa bona a la bufare cun petza arrustu; s'“Alberto Loi – Riserva” at unu sabore carcu e nuscos de frùtora e s'“Al” acumpàngiat bene sos pisches e sos aperientes. In fines, su “Rosemonti” est una bèvida frisca chi at unu bellu colore rosa e nuscos de frùtora sicada.

Tra sos “IGT Isola dei Nuraghi” agatamos etichetas bellas meda: su “Leila”, s'“Astangia”, su “Tuvara”, su “Loi Corona” e su “Nanà”. Sunt binos unu prus bonu de s'àteru chi naschent dae diversas ratzas autòctonas.

A serrare sa proposta enològica de sa Cantina Alberto Loi ddoe at su "Nibaru”, unu binu Mònica chentu pro chentu, e unu Vermentinu, su “Theria”. Sa primu bèvida at unu colore ruju, unu sabore caente e podet acumpangiare bene sos màndigos de rosu, de macarrones e tzupas. Su “Theria” est unu biancu friscu bonu a lu bufare cun màndigos de mare, petza bianca e casu friscu.

Sa cantina Loi est rica de binos licantzos. Semus faeddende de una realidade vitivinìcola capassa de conchistare sos palados de totus, finas cussos chi non si cuntentant cun fatzilidade.