Rubiu: birras màstrinas chi ispantant

* Dae sa terra a sa butìllia * - Est santantioghesu e at unu nùmene chi ammentat sa genti arrùbia de Sardigna. Semus faeddende de su birrifìtziu màstrinu e brew-pub “Rubiu”, unu progetu fìgiu de un'idea de Fabrizio Melis e Luca Garau, duos sòtzios ligados a forte dae sa passione pro sa birra artesanale. Unu progetu in ue istùdiu, amore e matèrias primàrgias de calidade sunt diventados sos ingredientes de bèvidas licanzas chi ant nuscos chi sunt un'ispantu a los godire.

Est dae totus custos elementos chi sunt nàschidas sas ampuddas a marcu “Rubiu”, produtos ùnicos e de caràtere chi bisòngiat a los tastare una bia in sa vida.

Posca de un'esperièntzia longa in domo, e a pustis de unos cantos stages, in su 2009 pro Fabrizio e Luca est arribada sa detzisione prus importante: sa de creare una faina issoro. Gosi, su progetu Rubiu at leadu forma in s'Ìsula de Santu Antiogu.

In die de oe onni eticheta firmada Rubiu est una bèvida màstrina, una birra chentu pro chentu crua. Totus sas birras chi essint dae custu birrifìtziu sunt sena conservantes, torrant a incubonare in ampudda, non sunt ni pastorizadas ni coladas, e – cosa importante meda – sunt totu fatas e postas a manu intro sas ampuddas.

Sos ingredientes impreados sunt semper de calidade arta. Difatis, in prus de s'issèberu de sos mègius maltos europeos comente su Maris Otter, ant importàntzia sos lupùlos puru, comente su de su East Kent Goldings e su de su Saaz, ingredientes seletzionados mescamente pro su nuscu issoro.

Cales sos resurtados finales? Totus sas bèvidas Rubiu faeddant de su territòriu de sa Sardigna de giosso, pro ite onni retzeta est ligada a istrintu a sas raighinas de sa Meurreddia-Igresienti.

Cun sa punna de faeddare de custu territòriu sunt istadas creadas: sa birra Triga, una Bière Blanche cun pagu gradu de alcol; sa Lido, una Golden Ale beverina e frisca; sa Raìs, una English Ale lupolada meda; sa Moresca, una Belgian Dark Ale licanza e de caràtere; sa Flavia, una Golden Strong Ale chi satisfaghet su paladu cun unu gradu alcòlicu artu; sa Centesima, un'American Porter iscura che pighe; sa Mosaico, una Summer Ale frisca e praghile.

In su brew-pub acostagiadu a su laboratòriu birràiu si podent mandigare pitzas licanzas e produtos tìpicos de Sardigna acumpangiados semper de una tassa de birra sana e sinchera.

In fines, carchi annu fait sos de Rubiu ant abertu peri un'àteru brew-pub in Casteddu, unu logu modernu in ue est possìbile tastare bèvidas ispantosas e mandigare pitzas realizadas cun produtos sardos bonos meda.