Zemyna Brewery: birras màstrinas cun su coro nugoresu

* Dae sa terra a sa butìllia * - Faghet birras chi ispantant, s'agatat in Nùgoro e su nùmene suo est Zemyna Brewery. Ma chie est Zemyna? Pro lu cumprèndere depimos fàghere unu biàgiu in intro de sa mitologia lituana.

Pro sos lituanos Zemyna est su sìmbulu de sa Mama Terra, amparadora de sos fundos coltivados e de sa fertilidade de s'incùngia, de sos animales e de sos òmines.

Su cultu de Zemyna s'esprissaiat pro mèdiu de ritos rigorosos meda. Bastat pensare ca s'oferta de sa birra deviat èssere respetada a manera pretzisa e onni faddina podiat èssere cajone de cunsighèntzias orrorosas.

No est totu, ca Zemyna est puru su sèmene de sa terra, fìgia de su Sole Saulè e de sa Luna Menules. Ma ite nch'intrat custu contu cun sa birra? Simple: sas birras firmadas Zemyna sunt ispiradas a custa paristòria de sa traditzione lituana.

Zemyna Brewery est unu birrifìtziu màstrinu chi faghet feti bèvidas de caràtere chi sunt su frutu de sa passione de pitzocos chi ant a conca sa figura de unu mitu istràngiu. Nointames sunt resèssidos a lu ligare a sa terra de Sardigna cun produtos chi faeddant de s'ìsula.

Sos de custa realidade brassìcola sunt produtos chi naschent dae sa chirca fitiana de sa calidade e dae s'isperimentatzione chi est sighida a s'istùdiu de unu packaging bantzigadore. Onni eticheta produida faeddat de sa Mama Terra.

A fàghere cumpangia a sas bator birras istòricas - est a nàrrere a sa Saulè, una Bitter Ale a colore de pinnadellu chi at 4,3 grados de alcol; a sa Kartus, un'IPA a colore de arantzu bellu càrrigu cun 6 grados de alcol; a sa Aukso, una Golden Ale a colore de oro de 4,5 grados de alcol e a sa Stout Menulis, birra niedda pighida chi at 5 grados de alcol -, dae su mese de trìulas de su 2020 ddoe at sa Kotaro puru, un'eticheta ispantosa, una bèvida American Pale Ale de 5,2 grados de alcol. Sa Kotaro est una birra màstrina gluten free chi la podent bufare sos celìacos puru.

Non est acabada inoghe, ca Zemyna Brewery at in cantieri àteras birras noas puru. Ite nàrrere? Tocat a tennere passietzia pros las tastare e las godire. In s'interi si podimus delitziare cun sas àteras creatziones de su birrifìtziu.