“Vigneti Zanatta”: una traditzione vitivinìcola estremada

* Dae sa terra a sa butìllia * - Est una realidade vitivinicola giòvana, si cramat "Vigneti Zanatta" e at sas bìngias suas in Sardigna e in Vènetu. Cussa tra Sardigna e Vènetu est sa coja de duas terras ricas de bingiateris e ricas de traditzione e cultura enològica.

Dae custas duas terras aunidas de sa bide, in su 2003 naschet un'azienda istremada chi produit binos licanzos e importantes.

Sa regione de sa Sardigna chi in su 1975 acasàgiat s'enòlogu famadu Bruno Zanatta est Gaddura, sa  terra de sas rocas granitinas allisadas dae su bentu, dae s'abba e dae su mare.

Zona de terrinos pagu saliosos e pagu fèrtiles, sa Gaddura est una regione de su cabu de susu chi lassat tretos mannos a sa coltivatzione de sas bìngias.

Est inoghe ca Bruno, enòlogu trevigianu giovaneddu cumentzat sa carriera sua balangende una connoschèntzia manna de su territòriu gadduresu e de sa terra sarda.

Colados trinta annos, sa passione sua, oramai consolidada, si mudat in un'azienda: sa "Vigneti Zanatta". Cun su fìgiu Marco a su costàgiu Bruno creat una realidade vitivinicola de famìlia, un'azienda manna prus de 100 ètaros. Sos primos 16 ètaros, comporados in su 2003, sunt istados allevados a Vermentinu e Cannonau.

Posca, in su 2005, sos Zanatta compont àteros 90 ètaros de terra in Terranoa. De custos 90 ètaros 60 sunt coltivados a bìngia. Sas bides pastinas sunt semper Vermentinu e Cannonau. Est dae s'àghina terranoesa chi naschent su "Vermentino di Gallura DOCG Renadoro" e su "Cannonau di Sardegna DOC Salana".

A fàghere cumpangia a custas etichetas ddoe sunt su "Tararà", unu "Cannonau di Sardegna Riserva DOC"; "Le Saline", unu "Vermentino di Gallura Superiore DOCG"; e "Orion", unu "Vermentino di Gallura DOC". Onni bèvida firmada Zanatta costoit unu mundu de nuscos e sabores de iscobèrrere.

Sas fainas Zanatta non si sunt firmadas e sa filera produtiva at sighidu a crèschere cun su fràigu de sa cantina de vinificatzione noa in su 2008. Dae custa data, s'apentu, s'esperièntzia e sa professionalidade de s'azienda ant donadu galu prus energia a unu motore produtivu chi proponet binos istimados meda chi nos mustrant chi est capassa de donare vida a sas traditziones vitivinìcolas de duas terras tesanas.