Tholos Brewery: una bella realidade brassìcola totu de iscobèrrere

* Dae sa terra a sa butìllia * - Est una produtzione chi at sa domo sua in Nùgoro, su cabu de logu de sa Barbàgia. Semus faeddende de “Tholos Brewery”, una realidade brassìcola chi produit birras interessantes meda pro totus sos apassionados de custu tipu de bèvida.

Sa de su mastru birràiu Giuseppe Dettori est un'isfida importante aberu, chi at comente punna sa valorizatzione de su territòriu. Difatis onni retzeta e onni birra produida est su sutzu de sa traditzione e de sa cultura de su logu chi cheret rapresentare.  

“Tholos Brewery” est sa cumpridura de unu bisu nàschidu in 2009, cando Dettori nde fiat restadu ammaghiadu dae una tassa de birra fata dae unu birrifìtziu iscotzesu nodidu. Est dae inoghe chi est tzucadu s'aventura birràia de Giuseppe, chi dae amantiosu de sa birra agena s'est mudadu in babbu de sa birra sua.

Tra istùdiu e faddinas, cando at megioradu sas tècnicas de brassràgiu, su màstru birràiu at detzisu de abèrrere su birrifìtziu màstrinu cosa sua. Fiat s'annu 2017.

S'impiantu produtivu de sas birras “Tholos Brewery” est ligadu a sa tecnologia tedesca, chi impreat una tècnica in istile “Brew in a bag”, tècnica chi permitet de lograre resurtados primorosos.

Pro mèdiu de custu sistema “All in One”, “Tholos Brewery” produit chimbe tipos de birras chi s'ispirant a sos istiles europeos e americanos.
Onni eticheta proposta naschet dae sa chirca e dae sa calidade manna de sas matèrias primàrgias impreadas. Un'isseberu atentu, chi cumintzat dae sos maltos e dae sos àteros cereales pro sighire cun sos lùpulos, s'abba, sas madrighes, sas ispètzias e cun totus sos ingredientes netzessàrios a fàghere custas bèvidas.  

De onni manera, sa chirca e s'istùdiu de custa realidade produtiva non si firmat e sighit su caminu suo cun sa punna de isperimentare tipologias de birras noas chi ant totus unu presupostu importante: isseberare semper sas matèrias primàrgias chi ligant a forte sa territòriu de Sardigna a sa birra. Un'esempiu? S'impreu de su ghinìberu e sa de sos àteros ingredientes tìpicos de sa magra mediterrànea.

No est totu, dae su 14 de su mese de austu coladu, difatis, su birrifìtziu de carrera Zara at cumintzadu un'esperièntzia noa, cun s'isseberu de impreare unu tipu de maltu de òrgiu chi benit dae sa filiera agrìcula italiana. Est unu maltu chi at a èssere impreadu pro produire duas de sas chimbe birras propostas.
"Tholos Brewery" est sinnaladu in sa “Guida alle Birre d'Italia  2021” de Slow Food Editore.