Harvest: una beer Firm chi faeddat de Gaddura e Campidanu

* Dae sa terra a sa butìllia * - Su brand Harvest naschet in Sardigna in su 2016. S'idea est de duos amigos, unu de su cabu de susu e s'àteru de su cabu de giosso. A los aunire est istadu su matessi amore pro s'òrgiu e sos lùpulos.

In die de oe su Beer firm Haverst acumandat sa produtzione sua a sos istabilimentos Birra Bellazzi.

S'aventura de Harvest est comintzada cando Davide Piga de Sètimu e Antonio Daga de Lungone ant leadu sa cualìfica de birràiu artesanu. Custu tìtulu lis at permìtidu de concruire unu progetu chi in unu primu momentu fiat feti unu giogu.

Posca, ambos ant detzìdidu de megiorai galu sas cumpetèntzias issoro comente homebrewer.

Sa de sos duos sòtzios est una faina chi dat atentzione manna a s'isseberu de sas matèrias primàrgias, ingredientes importantes pro otènnere una resèssida perfeta de sa produtzione brassicola issoro.

Cun Harvest onni particulare est contivigiadu cun pretzisione manna, e pro custa resone sa figura e sa grafica de sas ampuddas produidas sunt acumandadas a duos gràficos professionistas.

Sa produtzione firmada Harvest biet sa lughe in su mesi de santugaine de su 2016 cando Davide e Antonio faghent connòschere a su mercadu sa primu birra Harvest. Est sa "Rena Bianca", una bèvida blanche, chi si caraterizat pro àere unu sabore de agrumes e ispètzias. Una birra beverina e frisca cun unu nùmene chi ammentat sa Plaja de Lungone. Una birra importante, seletzionada dae sa rivista ispagnola "Mundo Birruno" tra sas mègius 12 bèvidas de sas 500 lòmpidas dae totu su mundu.

A manera crara una beer firm gazosina de ideas comente Harvest at produidu àteras birras puru. Dae sas retzetas de Antonio Daga e Davide Piga naschent etichetas primorosas, bèvidas ispantosas chi si lassant bufare a discansu. Gosi, paris cun "Rena Bianca" agatamos puru "Prenda Dorada", "Zina", "Malavagia", "Sa Rabi" e "Gadduresa".

A tempos de oe Harvest at in cantieri una birra noa, sa retzeta pro produire custa bèvida però est istada afidada a su birrifìtziu Alvure, una realidade brassicola màstrina de Su Masu.