Dae noranta annos una produtzione de binos importantes a firma “Cantina di Calasetta”

* Dae sa terra a sa butìllia * - Fiat s'annu 1932 cando trèighi bingiateris aiant detzisu de dare vida a sa “Cantina di Calasetta”, chi oe contat treghentos sòtzios.

Sos primos bingiateris chi aiant fundadu custa realidade produtiva fiant movidos dae una cumbintzione: totu cussu chi sa natura oferraiat in sa zona de sa bidighedda bianca de Cal 'e Sèda – su sole, su mare, su bentu, s'arena - diat àere podidu fàghere sa parte sua pro produire binos capassos de contare custu logu ispantosu. Sa punna insoru fiat duncas una feti: sa de costoire sas particularidades de sa zona cun una produtzione de binos elegantes e nuscosos.

In noranta annos de istòria pagu prus o mancu, sa “Cantina di Calasetta” podet contare una produtzione bella de binos primorosos. Sas bìngias de sos sòtzios de sa cantina sunt pastinadas a sa sarda. Bisòngiat a narrere puru ca in custos logos sas bides podent godire de su Bentuestu e de unu clima mediterraneu. Sunt duos elementos chi contribuint a fàghere de sa coltivatzione de s'aghina Carignanu, prenda pretziosa de custa realidade produtiva, una produtzione de primore.

Naschent gosi sas ampuddas a firma “Cantina di Calasetta”, una proposta de binos nieddos e biancos chi est famada in totu su mundu de sa produtzione vitivinìcola. Una produtzione chi no at fatu fartare prèmios e reconoschimentos importantes.

Dae sa passione e dae su traballu de sos sòtzios de sa “Cantina di Calasetta” sunt nàschidas bèvidas màstrinas nodidas. Su “Tupei” est unu nieddu produidu dae àghina Carignanu chentu pro chentu chi at unu sabore bellu carcu e si bufat bene cun màndigos de petza ruja e casu istajonadu. Su “Piedefranco” est un'àteru “Carignano DOC”, unu binu chi at otentu reconoschimentos importantes dae su mundu enològicu. Finas su “Maccòri” est una bèvida produida dae àghina Carignanu chentu pro chentu, unu binu nieddu giovuneddu chi at nuscos bellos meda de frùtora ruja. A serrare sa sèrie de sos nieddos ddoe est un'àteru Carignanu, est su “Àina”, un'ampudda nuscosa chi, tra sos medas arreconoschimentos, at otentu finas su “2 Bicchieri Guida Vini d’Italia del Gambero Rosso 2013”.

Comenti sutalineau giai, sa “Cantina di Calasetta” faghet peri atichetas de biancos. Sunt sas ampuddas de “Cala di Seta” e de “In Fundu”. Sa prima est una bèvida fata cun àghina Vermentinu chi s'acumpàngiat bene cun màndigos de pische. Su segundu, imbetzes, est unu “Moscato di Cagliari D.O.C.”, produidu cun àghina Muscadellu. Una bèvida chi at unu colore de oro, unu sabore bellu durche e nuscos de ispetzias e mele.