“Cantina Tani”: binos sardos chi mustrant s'ànima rocàrgia e mediterrànea de sa Gaddura

* Dae sa terra a sa butìllia * - S'agatat in Monte, una biddighedda gadduresa, e faghet binos de calidade manna. Su nùmene suo est “Cantina Tani”.

Sa de Tani est un'azienda de primore, una realidade vitivinìcola a gestione familiare chi traballat pro sa valorizatzione de su binu e de sa cultura de sa bide in Sardigna.

Nàschida in su 1980 dae sa bouluntade e s'amore pro sa terra de sos frades Tonino e Franco Tani, custa cantina dae su primu momentu at mustradu de èssere un'espressione bia e cuncreta de sos sabores e de sos nuscos chi su terrinu de sa Gaddura est capassu de espressare in sa tassa.

In su 2008, su ligòngiu mannu cun sa terra at portadu sos Tani a torrare a investire in s'isvilupu de s'atividade. Dae custu momentu, difatis, s'azienda Tani at incumentzadu issa etotu a pònnere su binu in sas ampuddas. Protagonista de custa innovatzione est sa de duas generatziones familiares, rapresentada dae sas fìgias de Tonino: Roberta e Angelica.

Pastinadas in su 1980, sas bides de s'azienda Tani ant prus de 35 annos de edade e sunt coltivadas serente a su Limbara. Sa cantina imbetzes naschet in su 2008 e nche l'ant fraigada in intro de su coro de sas bìngias. Frunida de atretzaduras modernas in atzàrgiu e de aposentos a suta de terra pro s'afinamentu in carradas de linna, est sa "domo" in ue sas etichetas Tani bient sa lughe.

Sas bèvidas Tani si caraterizant pro àere un'importante cumponente minerale rocalza chi espressat bene su caràtere de su territòriu. Frischesa, sabore, àrviu de pedra e matas mediterràneas sunt su resumu de sos binos a firma Tani. Semus faeddende de binos chi ant àpidu prèmios e reconnoschimentos importantes e chi si lassant bufare cun praghere mannu.

Sos Vermentinos "Meoru" e "Taerra" e sos nieddos, su Cannonau "Donosu" e su blend "Serranu", paris cun su "Tani Passito" sunt bèvidas echilibradas e de caràtere, etichetas interessantes chi faghent emotzionare.

De onni manera, custa realidade vitivinìcola non faghet feti binos bonos, pro ite produit una murta puru: su "Tani Mirto", unu licore licanzu chi at nuscos tìpicos mediterràneos.