Binos “Vitivinicola Montiferru”: su coro caente de Santu Lussurzu

* Dae sa terra a sa butìllia * - Su nùmene suo est “Vitivinicola Montiferru Società cooperativa agricola” e est una bella realidade produtiva chi est nàschida su 16 de abrile de su 2007 dae sa boluntade de unu grupu de sete amigos – chimbe òmines e duas fèminas - chi cumpartzint duas cosas: fiant totus tzitadinos de Santu Lussurzu e totus fiant bingiateris feti pro passione. Unu progetu, su de custa cantina, chi at mòvidu peri dae un'àtera idea: sa de dare unu traballu fissu a chie, intre sos fundadores de sa “Vitivinicola Montiferru” etotu, galu non nd'aiat.

Sa punna prus importante de sos fundadores de custa azienda coperativa est su progetu de recùperu de una produtzione enològica ligada a istrintu a Santu Lussurzu, unu progetu chi at s'iscopu finale de valorizare sos binos tìpicos de su logu.

Pro more de totu su chi amus allistadu, duncas, sa chirca est su coro caente de custa cantina e de sos sòtzios suos. Una chirca chi torrat a iscobèrrere sa traditzione, chi impreat s'innovatzione e chi s'aunit cun sa sustenibilidade.

Semper e cando, depemus finas sutalineare ca custas etichetas punnant a intrare tra sos frutos nodidos chi si produint in sa bidda de sa provìntzia de Aristanis: su casigiolu, sa petza de sas bacas de ratza sardo-modicana e s'abbardente.

Dae sa chirca e dae s'amore pro su territòriu issoro naschent sos binos “Don Nicolau”, “Carrelas”, su binu Rekreu e su “Terre Vulcaniche”, totus bèvidas otentas dae ratzas de àghina autòctona.

Su “Don Nicolau” est unu binu “Isola dei Nuraghi – I.G.T.”, unu blend otentu dae s'unione de àghina Muristellu, Cagnulari, Alicante e Cannonau. Una bèvida niedda chi pasat in carradas de linna e chi at unu gradu alcòlicu de 13,5%.

Su “Carrelas”, chi at unu nùmene chi est su donu chi sa cantina at fatu a su Carrasecare traditzionale de Santu Lussurzu, est un'àteru “Isola dei Nuraghi I.G.T.”. Una bèvida cun unu nuscu bellu carcu, unu nieddu chi costoit unu sabore friscu de frùtora, mescamente de mura.

Su "Rekrèu" est unu biancu bonu a lu bufare cun mandigos de pische, unu "Vermentino D.O.C." giai nodidu in su mundu de sos Vermentinos de Sardigna. Difatis dant giuigadu su de oto mègius binos in sa de duas editziones de sa "Piccola Guida ai Migliori Vini della Sardegna" (Vinodabere).

In fines, su binu “Terre Vulcaniche” est unu Cannonau, un'eticheta famada pro ite in su 2019 at otentu unu reconnoschimentu importante: at àpidu su primu prèmiu intro una classìfica de 30 binos Cannonau de s'ìsula. Unu reconnoschimentu de primore, chi est su frutu de unu traballu màstrinu e de una passione chi, a cantu paret, donat sos frutos suos.