VikeVike: su progetu de unu pitzocu de valore e sa produtzione de binos primorosos

* Dae sa terra a sa butìllia * - Una cantina chi naschet dae sa passione manna de Simone Sedilesu, un’enolugu giòvanu e de valore chi benit dae una famìlia de bingiateris de Mamujada. Crèschidu cun sos frades e sos fradiles in sas bìngias, custu pitzocu at imparadu a coltivare sa bide dae su babu. Diventadu un’òmine, at istudiadu, e posca at donadu vita a sa cantina VikeVike, una realidade primorosa, chi in die de oe produit etichetas interessantes, produtos chi ant una punna feti: sa de fàghere binos traballende sos frutos de sa terra, mescamente in su sartu, tra sas matas, pro ite s'aghina, intro de sa cantina, tocat a la ghiare sena a la ruinare.

Pro VikeVike s’isseberu de sos terrinos de Mamujada est istadu una cosa naturale. Sos sartos mamujadinos, difatis, sunt famados pro sa traditzione de sa coltivatzione de sas bìngias. In custas terras si produit mescamente Cannonau in sa mesura de su 95 pro chentu, ma est importante sutalineare puru ca in diri de ore b'est sa voluntade de valorizare sa Granatza puru.

Dae parte sua Simone Sedilesu at isseberadu de allevare feti bides autòctonas. Est pro custa resone ca s’azienda vitivinìcola VikeVike traballat duos ètaros e mesu de terrinos. Sa coltivatzione est biològica e s’incubonadura si faghet sena annànghere màdrighes.

Gosi, dae su traballu in bìngia si produint 10000 ampuddas de binu “Cannonau” nieddu, una bèvida chi at 14,5 grados de alcol, falat bene meda e est frisca a la bufare. Cun su nùmene “Barbagia IGT”, imbetzes, onni annu s’azienda faghet 300 ampuddas de Muscadellu. Custa eticheta est una prenda meravigiosa chi naschet dae bìngias de setanta annos de edade.

Su Cannonau “Rosato” est unu binu rosadu chi contat 500 ampuddas a s’annu e rapresentat una particularidade de sa produtzione de VikeVike.

Sa cantina faghet puru 2500 ampuddas de unu binu “Riserva”, unu nieddu chi est su resurtu de s’incuru de bìngias betzas de noranta annos.

Tra sas bèvidas VikeVike agatamos finas unu biancu fatu de àghina Granatza, una bide autòctona chi contat onni annu 1000 ampuddas de produtzione.

Totu sa sèrie de sas etichetas produidas dae custa realidade sunt binos de calidade, chi ant nuscos bellos e sunt bonus a los bufare.

A s’acabu tocat a nàrrere ca sos isseberos chi Simone Sedilesu faghet in bìngia e in cantina sunt coerentes cun s’adesione de VikeVike a Momojà, un’assòtziu de bingiateris e produtores chi ant domo in Mamujada e chi traballant pro valorizare sos binos produidos in sos sartos de sa bidda.