Sos "Poderi Parpinello": in S'Alighera sos binos pretziosos produidos cun esperièntzia e passione manna

* Dae sa terra a sa butìllia * - S'agatant in S'Alighera in localidade Janna de Mare. Sunt sas bìngias de sos "Poderi Parpinello", realidade agrìcula importante chi donat su nùmene a sa cantina cosa sua.

Faeddamos de un'azienda chi at un'istòria familiare longa tres generatziones. Gosi, dae chimbanta annos, sos contos de sa famìlia Parpinello adobiant sos de sa cantina. Sa punna est istada dae semper una feti: produire binos de calidade, bèvidas bonas chi costoint caraterìsticas dislindadas.

Cun s'obietivu de fàghere etichetas capassas de valorizare sos frutos de sa massaria de Sardigna, s'azienda at impiantos modernos e traballat sa terra e sos frutos suos rispetende sa traditzione e sos produtos tìpicos. Mescamente sa passione est istada unu tra sos elementos fundamentales pro otènnere sos prèmios e sos reconochimentos meda bìnchidos dae sos binos "Poderi Parpinello".

In die de oe, custa azienda vitivinìcola contat binti ètaros de terras e est ghiada dae Giampaolo Parpinello, un'enòlogu espertu, e dae su fìgiu Paolo. Sas bides sunt istadas pastinadas in unu sartu in ue sos terrinos sunt adatos pro sa produtzione de s'àghina. A inghìriu de sas bides bi sunt matas de olia chi faghent ògiu bonu.

Non est acabada inoghe. Difatis, tocat a nàrrere puru ca sos Parpinello allevant sas bides issoro cun atentzione e respetu pro s'ambiente.

Dae un'esperientzia de mesu sèculu sunt duncas nàschidas ampuddas famadas, binos nieddos e biancos primorosos chi sighint sa produtzione in bìngia. Una produtzione fata de àghina Cannonau, de Vermentinu, de Cagnulari e de Monica.

Ampuddas comente su “Cannonau Riserva”, unu binu carcu chi at 18 grados de alcol, e su “San Costantino”, àteru Cannonau chi si distinghet pro èssere una bèvida elegante e pro àere un'istrutura bona cun sabore de frùtora ruja, sunt tra sas prendas pretziosas de custa azienda. Difatis, in su 2018, pròpiu su “San Costantino” at otentu sa medàllia de oru in su Berliner Wein Trophy.

In sa sèrie de sos nieddos non mancat unu “Cagnulari - Isola dei Nuraghi IGT”, chi acumpàngiat bene sos màndigos de petza ruja e de catza, e unu “Monica”, chi cun sos nuscos suos de frores est bonu a lu bufare pro su gustu echilibradu.

Sa cantina est nodida puru pro sa produtzione de binos Vermentinu. S'"Ala Blanca" at 8 grados de alcol, costoit unu saboreddu de mèndula marigosa e est bellu a lu tastare cun màndigos de pische e de petza bianca, mentres su "Sessantaquattro" si distinghit pro sos nuscos suos elegantes meda. Est unu binu importante, chi naschet dae budrones isseberados cun incùru.

Totu custas ampuddas ant bìnchidu prèmios e sunt connòschidas in su mundu vitivinìcolu.