Sos binos “1Sorso”: tres ampuddas chi costoint sos sabores de sos montigros e de su mare

* Dae sa terra a sa butìglia * - "1Sorso". Est custu su nùmene de s' "Azienda Agricola Leonardo Bagella", chi s'agatat in localidade Trunconi, in sos sartos de sa comuna de Sòssu.

Semus faeddende de una realidade produtiva chi at un'istòria longa meda, un'istòria de chentu-chimbanta annos e prus, chi est cumentzada in s'Otighentos, cando sa famìlia Bagella s'est posta a coltivare sos terrinos suos.

Posca, in sos annos Chimbanta de su Noighentos, est istadu Mario Bagella a cumintzare a pastinare sas bides de una realidade chi in sos annos in fatu est divènnida interessante meda in intro de su mundu de sa produtzione de sos binos.

Galu, in sos annos Noranta sa ghia de s'azienda est passada a Leonardo, su fìgiu de Mario. Leonardo est unu pitzocu chi costoit sa memòria istòrica e is balores de s'azienda vitivinìcola de sa famìlia sua e chi, in su matessi tempus, abàidat a su benidore.

Sas bìngias chi donant vida a sos binos “1Sorso” gosant de unu clima ditzos, de s'espositzione particulare de sas terras a sa lughe de su sole e de sa cumpositzione de sos terrinos chi acàsagiant sas bides suas. In prus, su mare est a curtzu a sos cùcuros in ue s'agatant sas matas de bide. Custas etotu, duncas, leant vantàgiu dae su bentu chi a de note batit friscura.

Sas bides allevadas dae custa realidade produtiva de Sardigna sunt mescamente su Vermentinu, su Cannonau, su Muscadellu e su Cagnulari. Semper e cando, sos de “Azienda Agricola Leonardo Bagella” coltivant finas Muristellu, Caricagiola, Girò e Pascale de Casteddu.

Sos resurtos de su traballu in bìngia e in cantina sunt tres etichetas de primore, unu binu nieddu e duos biancos: unu “Cannonau”, chi comente sos àteros binos est produidu feti cun un'arregorta manuale, e est una bèvida callente e carca; unu “Vermentino” a sabore de cariasa, e unu Muscadellu, su “Millenovecento64”, una bèvida frisca chi at nuscos de frùtora sicada, de mele e de flores de aràntzu.

Pro intrare in sa domo de sos nuscos e de sos sabores de s' “Azienda Agricola Leonardo Bagella” non b'at àtera cosa de fàghere: tocat de tastare sos binos issoro!