EXMU: su birrifìtziu agrìculu chi produit birras cun òrgiu coltivadu in sos terrinos cosa sua

* Dae sa terra a sa butìllia * - “EXMU Farm Brewery and Distillery” est un'azienda familiare chi s'agatat tra Tàtari e S'Alighera, a pagu chilòmetros dae su portu de Portu Tùrre. Est unu birrifìtziu màstrinu in ue si sighit totu su protzessu de produtzione, cumintzende dae sa coltivatzione de sas matèrias primàrgias finas a lompere a cando sas birras intrant in sas ampuddas.

Gràtzias a un'azienda agrìcula istòrica, difatis, custa realidade, posta in opera dae Antonio Oggiano e Pietruccia Sole e in die de oe ghiada dae Alessandro Cossu e Simona Ruda, at una punna feti: sa de fàghere produtos de calidade manna rispetende sa natura.

Su resurtu finale sunt sas birras EXMU, bèvidas màstrinas chentu pro chentu, produidas sena de èssere coladas o de annànghere aromatos artifitziales. Birras, duncas, chi costoint sas caraterìsticas de sas matèrias primàrgias coltivadas in sos terrinos de s'azienda.

S'istòria de onni eticheta cumentzat cun sa produtzione de s'òrgiu, cussu de sas calidades antigas, chi si coltivat pro more de unu progetu de circa chi EXMU sighit cun s'Universidade de Tàtari e cun "Porto Conte Ricerche". Posca, si faghet s'arregorta: s'òrgiu intrat in su birrifìtziu pro produire sas birras. Gràtzias a custu protzessu, EXMU at otentu su marcu de birrifìtziu agrìculu.

Sas prendas produidas dae s'azienda EXMU sunt chimbe, sunt bèvidas chi acuntentant onni paladu e sunt una prus bona de s'àtera. Gosi, in sa sèrie de etichetas podimos agatare sa “Golden Duck”, una Blonde Ale frisca meda a la bufare, cun aromatos de frores e frùtora, e sa “Red Turkey”, una Amber Ale a colore de pinnadellu ecuilibrada e cun unu bellu saboreddu de maltu. A sighire, sa “Black Sheep”, una Stout adata pro acumpangiare sos màndigos de petza arrustu e durches cun tziculate. A s'apellu non podiat mancare una Strong Ale, sa “Copper Mule”, una bèvida a colore de ràmene cun sabore de frùtora, e una Barley Wine, sa “Bronze Horse”, chi at nuscos meravigiosos e est bona a la bufare cun casu e durches.

Non est totu, ca dae sas birras cosa sua EXMU faghet puru tres distillados. Naschent gosi su Distilladu de sa birra “Golden Duck”, cussu de sa birra “Copper Mule” e cussu de sa birra “Black Sheep”.

Sa chi amus contadu est un'istòria de esperièntzia e de cumpetèntzia e, lighende bene, est finas un'istòria de amore pro sa terra e sos frutos suos.