Terrantiga: sas birras mastrinas de sa domo de su mele

* Dae sa terra a sa butìllia * - Sunt birras mastrinas fatas dae chie de bator inzènnerros de traballu faghet s'abiaresu. Semus faeddende de sas bèvidas a firma Terrantiga, sa coperativa agrìcula de Santu Sparau famada pro sa produtzione de mele biològicu de primore.

Sas birras produidas dae custa realidade produtiva non sunt prus pagu interessantes de su mele. Difatis, sas bèvidas produidas cun custa eticheta sunt sa rapresentatzione de unu modu diferente de pensare a sa birra mastrina. Totus sas ampuddas non sighint niuna pianificazione, ma naschent ponende mente a sa meleda, chi permitit a sos de Terrantiga de isperimentare acrobamentos mègius po donare a su paladu bèvidas chi non si podent immaginare. Gosi, onni birra proposta trasmitit nuscos e sensatziones chi est difìtzile a las descrìere a paràulas: tocat a las tastare!

Totus sas etichetas ant comente ingrediente su mele produidu dae sa coperativa etotu, ma non totus sas bèvidas sunt fatas cun su matessi mele: onni birra at comente ingrediente su mele biològicu prus adatu.

Sas birras Terrantiga sunt fìgias de un'idea chi est sighida dae una chirca fitiana, dae ingredientes de su logu e dae s'impreu de maltos tedescos e lùpulus esòticos comente sos coltivados dae sos indianos de America. Est gosi chi sas birras produidas si distinghint pro àere una personalidade originale e interessante. Custa bèvidas s'agantant in tambulanas de 20 litros e in ampuddas de 0,75 litros e de 0,33 litros.

Sas etichetas Terrantiga sunt produidas in su birrifìtziu San Paolo, chi sighit a manera pretzisa sa retzeta elaborada dae sa coperativa de su mele. Onni birra produida est una bèvida de calidade manna. A lu atestimonzare sunt sos reconnoschimenstos otenidos. Tra sos ùrtimos su prèmiu binchidu in su 2020 dae s'etichetta Istadi in sa setzione fraricru. Una birra nuscosa e sinchera, chi non est pastorizada, est genuina e at tra sos ingredientes suos su mele de aràngiu bio Terrantiga.

A faghere cumpangia a Istadi agatamus àteras birras primorosas. Tra custas sa Nibari, una birra cun tzìnibiri chi at un'ispuma carca e fini, una Indian Pale Ale chi at unu bellu marigosu armònicu.

Galu, sa proposta birraia Terrantiga si arrichit de sas birras Pressius, Citra, Bresca, Atlantide e Pressius Generator.

Pressius est una bèvida cun pèssighe a bassa incobunadura e s'ispirat a sas birras chi sunt produidas in Germania in su mese de maju, est a nàrrere a sas Marzen o Keller.

Citras, imbetzes, est una birra fata cun sa pompia, una bèvida chi at totu sos nuscos meravizos de sos agrumes de Sardigna.

Bresca, comente narat su nùmente suo, est una birra a su mele, fata feti isseberende sos meles mègius de sa produtzione de sa coperativa. Una bèvida a colore de pinnadellu chi at unu sabore bellu prenu.

A ammentare sos contos de Platone nche pensat Atlantide, una birra ecuilibrada bene, bona a la bufare mandighende pische.

Ispirada a s'istile American Pils, Pressius Generator est una birra chi alabat sas pèssighes de Santu Sparau. Non est totus, pro ite in prus de sas pèssighes custa bèvida alabat s'arte e sos artistas de sa bidda.

Gràtzias a una chirca semper noa, Pressius Generator est una birra chi at sa capatzidade de tramudare onni annu s'istile suo. Lu faghet impreende una retzeta semper noa, ma, a manera òvia, s'ingrediente printzipale, est a nàrrere sa pèssighe, non tramudat mai. Impare a sa retzeta mudat puru s'eticheta, chi at èssere posta in òpera semper dae un'artista diversu de sa bidda.