Sas "Tenute Olbios": un'istòria de tres inzènneros chi est ghiada dae una fèmina giòvana e de valore

* Dae sa terra a sa butìllia * - Su nùmene suo est "Tenute Olbios" e s'agatat in localidade Venafiorita, tra Tarranoa e Lòiri Portu-Santu Paolu, in cara de s'ìsula de Tavolara e a curtzu de su Casteddu de Pedres.

Cun sessanta ètaros de terras, cust'azienda vitivinìcola at un'istòria de tres inzènneros e in diri de oe est ghiada dae Daniela Pinna, enòloga e agrononoma giòvana e de valore, una fèmina chi at mescamente una punna: sa de valorizare su Vermentinu, unu binu chi contat su territòriu de sa Gaddura e sas caraterìsticas de sos terrinos suos. Sunt terrinos arenàrgios e granitinos, elementos importantes pro ite dant una caraterìstica minerale a sas bèvidas de sas "Tenute Olbios".

Est istadu su giaju de Daniela Pinna a cumentzare sa coltivatzione de sas bides traballadas dae custa cantina e a creare unu primu statzu industriale, torradu a nou de pagu tempus e coro de custa azienda vitivinìcola.

Oe, cun su traballu suo, Daniela Pinna aunit traditzione e innovatzione. Gosi, sa chirca fitiana de una produtzione de primore at batidu custa cantina a isseberare sa coltivatzione biològica e a sighire cun s'arregorta manuale de sas àghinas.

Su resurtadu finale est una proposta de binos elegantes, chi ant giai otentu reconnoschimentos importantes. A lu contare est mescamente su “Lupus in Fabula”, unu Vermentinu de Gaddura “DOCG Superiore” prenda manna de custa realidade produtiva. Una bèvida elegante, frisca e fine meda. Unu binu chi naschet dae sas terras coltivadadas in cara de su mare, chi a su note sunt refriscadas dae s'arvile marinu, carrigu meda de iòdiu.

In sa filera de sos biancos ddoe at “In vino veritas”, un'àteru Vermentinu ma diferente dae su “Lupus in Fabula”. Custa, difatis, est una bèvida chi imbetzat pro medas annos in carradas de azarzu e linna e chi at unu sabore caente.

Puru su rosadu "Cavè" meresset s'atentzione nostra. Custu, difatis, est unu binu “IGT Colli del Limbara” chi si faghet feti cun àghina autòctona, una bèvida chi est frisca e si lassat bufare a discansu.

Tocat a nàrrere ca custa realidade vitivinìcola produit finas bides a brudone nieddu: bides autòctonas comente su Cannonau e su Muristellu e bides non autòctonas puru, comente su Cabernet Sauvignon e su Merlot.

Finas sa coltivatzione de àghina niedda produit ampuddas nòdidas, comente su “Nessuno”, unu IGT Colli del Limbara chi est una bèvida carca e caente, cun sabore de frùtora e pìbere.

A serrare custa lista ddoe at un'ispumante biancu, su Bisso, chi naschet dae un'istùdiu longu meda. Custu binu est fatu feti cun àghina Vermentinu.