Sas propostas de sa "Cooperativa Agricola Cantina del Mandrolisai": binos carcos e chi non si podent confùndere

* Dae sa terra a sa butìllia * - Nàschida in 1950 in Sorgono, sa primu binnenna de sas bides suas est de duos annos a pustis. Fit su 1952 cando sa "Cooperativa Agricola Cantina del Mandrolisai" at cumentzau a produire sos binos suos.

Sos terrinos a cara de su sole, chi connoschent istades longas meda,  pagu abba e su traballu de sos sòtzios de sa coperativa sunt sos elementos de fundamentu pro produire àghina primorosa.

Difatis, sas caraterìsticas de su clima e cussa de s'espositzione de sos montigros, in ue sunt pastinadas sas bìngias traballadas de sos bingiateris de sa cantina, contribuint a sa calidade manna de sos binos produtos. Pro lu cumprèndere est bastante dare una mirada a sas bìngias de sa "Cooperativa Agricola Cantina del Mandrolisai" chi s'agatant in su territòriu de Sorgono e in cussos de Atzara, de Meana, de Ortueri e de Samugheo. Totus zonas perfetas pro pastinare bides.

Sunt milli-dughentos ètaros sas terras coltivadas a bide dae custa realidade prudutiva, mentras sa produtzione arribat a fàghere baranta cuintales de àghina a s'annu.

Dae su 1981 sos binos de custa realidade produtiva ant otentu sa tzertificatzione "DOC - Denominazione di Origine Controllata Mandrolisai". Sa produtzione prus importante est sa de s'àghina de Cannonau, sa de sa Muristeddu e sa de sa Monica. Sos frutos de custas bides faghent binos nieddos crispos, chi ant unu sabore chi non si podet confùndere.

A pustis de sa binnenna, sos binos de sa "Cooperativa Agricola Cantina del Mandrolisai" faghent sa cumpridura issoro in intro de carradas de orròele. Custu est unu protzessu importante e longu meda chi contribuit a manera determinante a sa resessida de bèvidas estremadas.

Sas etichetas de sa "Cantina Mandrolisai" sunt rapresentadas de duas propostas: sa "Linea Tradizionale" e sa "Linea Kent'annos".

Sa sèrie de sa "Linea Tradizionale" est rapresentada de chimbe ampuddas, tres binos nieddos e duos biancos. Tra sos nieddos agatamus su "Rosso Superiore - Mandrolisai Doc", una bèvida de sabore bellu carcu, chi naschet dae unu blend de Cannonau, Muristeddu e Monica. Custa bèvida imbetzat pro unu tempus de duos annos.
A fàghere cumpangia a custu binu sunt sas etichetas "Rosso - Mandrolisai Doc", unu binu fatu de àghinas Cannonau, Muristeddu e Monica e imbetzadu pro unu tempus de ses/oto meses, e su "Granito Rosso - Isola dei Nuraghi IGT", una bèvida incubonada in carradas de atzarzu chi si faghet feti cun àghina autòctona.

"Granito Bianco - Isola dei Nuraghi" e "Ternura" sunt, imbetzes, sos duos binos biancos. Su primu est una bèvida perfeta la bufare cun màndigos de pische e su segundu est unu binu durche chi si faghet cun àghina regorta in una binnenna trigadina. Òtimo a lu gustare cun durches e casu istasionadu.

S'àtera sèrie, sa "Linea Kent'annos", est una proposta noa fata de bator binos nieddos, unu biancu e unu rosadu.

"Kent'annos - Mandrolisai Superiore Rosso Doc Gold", "Kent'annos - Mandrolisai Superiore Rosso Doc", "Kent'annos - Mandrolisai Rosso Doc" e "Kent'annos - Cannanau di Sardegna" sunt sos binos nieddos, mentras su binu biancu est rapresentadu dae su "Kent'annos - Vermentino di Sardegna Doc" e su rosadu dae su "Kent'annos - Mandrolisai Doc Rosato". Totus custas bèvidas sunt dedicadas a su territòriu chi produit s'àghina.