Documentu. Fronte Indipendentista Unidu "un’atzione pro torrare a vida su bilinguismu perfetu"

Sa Giunta Pigliaru cumposta dae sos partidos coloniales e dae sos bàculos issoro “soberanistas”, finas a como at fatu cumprèndere de èssere contrària a sa normalizatzione de sa limba sarda serrende cale si siat carrera chi nos potzat giùghere a su bilinguismu perfetu.

Tantu pro comintzare sunt istados bogados dae su Bilantzu regionale tres miliones de Euros pro sa limba Sarda, ponende in dificultade tota sa politica linguìstica fata in custos ùltimos deghe annos e, cun s’iscuja chi non b’at dinari si segat subra sa limba e non in àteras boghes de ispesas. E difatis pro ocannu non b’at a èssere politica linguìstica in sos medios, nudda sardu in sas iscolas, nudda a sa tradutzione in sardu de sos classicos de sa literadura.

Bidu finas: sas pagas rigas e pagu craras dedicadas a sa Limba Nostra intre su Programma Regionale de Isvilupu 2014 – 2019, aprovadu su 21 de Santugaine coladu, peruna paràula pro sa Limba sarda est istada inserida in s’agiornamentu de su VAS, Valutazione Ambientale Strategica, in s’ambitu de sa programmatzione pro su setennadu 2014 –2020, cun su cale benint predispostos sos progetos pro sos finantziamentos Europeos comente sos POR ectz. ectz. e, nudda s’ischit de su Pranu triennale nou pro Sa Limba Sarda iscadidu in finitia de su 2013 , atu in ue si bidet in cuncretu sas atividades chi sa Regione pro mesu de su Servìtziu Limba e Cultura Sarda devet pònnere in èssere.

Totu custu sena pessare e cumprèndere chi unas de sas causas prus importantes de sa crisi de sa Sardigna Nostra e de nois Sardos (ammentamus chi sa Sardigna est de sas primas regiones de Italia colonialista cun sa prus alta isperdidura iscolàstica de dischentes o istudiantes) est su de nos àere irraighinadu dae sa Limba Nostra, chi est sa fundamenta de s’identidade culturale de su populu.

S’assessora Firinu finas a como non at craridu cale est sa positzione sua in mèritu a sa normalizatzione de sa Limba Sarda mentres at fatu ischire in cara a totus chi non nde cumprendet nudda e chi s’at a pònnere a istudiare. Nos preguntamus duncas, comente un’Assessora a sa cultura potzat fàghere tzertas afirmatziones. Un’Assessore/a non benit numenadu pro istudiare ma pro ghiare e fàghere sas leges ogetu de cumpetèntzia sua in s’interessu de su populu. Mancari in sas primas dies de Santugaine apet fatu ischire chi mancaiant pagas dies a sa nomina de su Diretore de su Servìtziu Limba e Cultura Sarda, custu postu est ancora bòidu.

Paris a sa Limba Sarda sa Giunta Pigliaru est furriende in s’ammodigadòrgiu su traballu e sa professionalidade de una chentina e prus de operadores limguìsticos.

Pro totu custos motivos su Fronte Indipendentista Unidu at detzisu, imperistantu, de mòvere un’atzione pro torrare a vida su bilinguismu perfetu, a incomintzare dae unu fatu chi totu sos Sardos podent bìdere in cuncretu: sa Toponomàstica.

Su Sardu pro torrare a èssere limba cun sa matessi dinnidade de s’Italianu, devet, difatis, torrare a èssere a sa vista de totus, reconnoschìbile e ufitziale. Su Sardu devet torrare in sas carreras, in sas pratzas e, a paris dinnidade in sas iscolas, in sos mèdios, in sos ispidales, is sos ufìtzios pubblicos.

No amus tempus de isetare sas manfrinas de sos politicos colonialistas, imperistantis amus detzisu de comintzare a torrare a batijare sas pratzas e sas carreras, chi a s’ispissa tenent sos nùmenes de sos odiados colonizadores de sos Savòjas comente Cavour, Carlo Felice, Bogino e Conte di Moriana.

Su Bilinguismu passat puru intre su recùperu de sa memòria istòrica e intre sa valorizatzione de sas isperièntzias positivas comente cussas de sos perìodos giudicales, antifeudales e repubblicana de sos motos angioyanos. Ma finamentra in su recuperu de nùmenes istòricos e antigòrios chi teniant in antis sas carreras e sas pratzas, chi pro sèculos ant caraterizadu sa vida fitiana de sas Tzitades e de sas Biddas Nostras a su postu de semper sos matessi nùmenes de tzitades e de pessonàgios italianos.

Sa polìtica linguìstica est pro su Fronte Indipendentista Unidu unas de sas suas prioridades e at a partetzipare a totu sas mobilitatziones chi ant a tènnere comente riferimentu sos puntos chi sighint:

1) normalizatzione de su sardu

2) lòmpere a su bilinguismu perfetu

Su Fronte Indipendentista Unidu at a fàghere sighire a custa, àteras initziativas cuncretas pro appretare s’opinione pubblica sarda subra su tema fundamentale de sa politica linguìstica.

Su Fronte Indipendentista Unidu at a sighire a fraigare cun sos àteros cumponentes de sos movimentos natzionales s’ùnica e sèria alternativa digna e giusta pro sa Terra Nostra contra a cussa ispartzidora, impoberidora e ammiseradora de su sistema coloniale italianu.

Fronte Indipendentista Unidu