Documentu. aMpI: "Bastat cun su bochidorgiu sionista in Palestina!"

Dae paritzas dies sos sordados cun s'isteddu de David, boginos sionistas de su de 4° esèrtzitos prus fortes de su mundu, sighint a bombardare dae chelu, dae terra e dae mare, masellende sa populatzione tzivile palestinesa chi istat in Gaza, unu territòriu minore meda in ue sunt acorradas prus de unu millione e mesu de persones.

Non b'at de crèere mancu a una paràula de totu su chi nos narant sos mass-mèdia otzidentales, ca sos palestinesos mortos o fertos ant a èssere meda de prus de su chi nos ant a contare, e gasi at a èssere fintzas pro sos palestinesos arrestados a trumas, sas domos issoro ghetadas a terra e totu sos crìmines chi connoschimus de sas fortzas armadas nazi-sionistas.

Custa borta puru sos òrganos de informatzione sighint a repìtere chi est comintzende un'àtera gherra: ma custa est una fàula manna! Sa gherra contra a su pòpulu palestinesu est comintzada in su 1948 e dae tando custu pòpulu est patende totora unu degollu, in su mentres chi sa comunidade internatzionale, e mescamente sos Istados Unidos, abarrat muda e còmplitze de s'ocupatzione militare sionista.

Pedimus a sa mègius parte de su pòpulu sardu, sos patriotas, sas organizatziones, sos assòtzios e sos comitados chi creent in su balore de sa difesa e de s'autodeterminatzione de su pòpulu palestinesu, de leare positzione esprimende sa solidariedade prus manna e sentzilla.

A Manca pro s'Indipendèntzia, esprimende sa solidariedade internatzionalista sua cun sa Palestina, rivendicat pro su pòpulu palestinesu su deretu a sa lota de resistèntzia, pro si difèndere dae sos atacos e dae su masellu chi est faghende s'esèrtzitu israelianu, pro s'autodeterminatzione e sa liberatzione dae su sionismu, dae su colonialismu e dae s'imperialismu.

S'organizatzione nostra pedit a totu sos sardos de boicotare totu sas cosas chi sunt ligadas in cale si siat manera cun sos interessos sionistas a livellu sotzio-culturale, assotziativu, cummertziale, e gasi sighende.

A Manca pro s'Indipendèntzia, si diat serbire agiudu e intre sas chi sunt sas possibilidades suas, si cheret pònnere a disponimentu de sa comunidade palestinesa in Sardigna.

Bivat sa Resistèntzia de su Pòpulu Palestinesu

Bivat sa pelea de liberatzione de su Pòpulu Palestinesu contra a su sionismu, su colonialismu e s'imperialismu.

A Manca pro s'Indipendèntzia