Documentus asuba de sa vida sarda in s'òpera "Otzàna in is fotografias e in is documentus pigaus de Fridolin Weis Bentzon"

(IlMinuto) – Casteddu, 28 de su mesi de fiàrgiu - At essi presentada dominigu 2 de su mesi de martzu a is 9.30, in su Tzentru "Polivalente" arruga Emili Lussu in Otzàna, s'òpera "Otzàna in is fotografias e in is documentus pigaus de Fridolin Weis Bentzon". Sa presentada de sa publicatzioni, aprontada de s'assòtziu culturali Iscandula cun s'agiudu de s'aministratzioni comunali de Otzàna, s'assòtziu Sa Ilonzana e sa Regione Autònoma de Sardigna tenit s'iscopu de presentai a sa genti su materiali pigau de s'antropologu danesu in is viàgius suus in Sardigna. Fueddaus de pagu prus de 30 fotografias in biancu e nieddu de su Carnasciali de su 1958, màginis a caboris de is biseras pigadas e allogadas in su Museu Natzionali de Danimarca o a domu de familiaris e amigus, e de is registatzionis sonoras de is cantus de is piciocas de su 1962. "Si depit amentai ca custas cosas depint abarrai sèmpiri comenti documentus asuba de sa vida sarda e su chi oi est comunu podit lassai a buca oberta àterus inzènnerus". Funt custus is fueddus chi s'antropologu danesu Andreas Bentzon iat scritu in d-una lìtera de su 1958 a su Maistu de launeddas Dionisu Burraca chistionendi de sa cultura sarda. Est difatis asuba de custa cumbintzioni chi nascit sa publicatzioni noa de Iscandula chi si fundat apitzus de is documentus pigaus de Bentzon in sa comunidadi de Otzàna intre is annus '50 e '60. Unu programa arricu, su prevìdiu po dominigu 2 de su mesi de martzu, chi agoa de su saludu de su sìndigu Giuannipaolu Marras, at a oberri una fibera de relatas: de sa de Christian Ejlers, cumpangiu de viàgiu de s'antropologu, a sa de su fotoreporter Uliano Lucas, de s'etnomusicologu Salvatorangelu Pisanu a Simoni Ligas circadori de su Dipartimentu de Istòria, Iscièntzia de s'òmini e de sa Formatzioni de s'Universidadi de Tàtari, de Danti Olianas, editori e presidenti de s'assòtziu Iscandula a s'archeologu Pepinu Atzori. S'òpera est valorada po sa comunidadi de Otzàna. Ant essi difatis 500 is copias de "Otzàna in is fotografias e in is documentus pigaus de Fridolin Weis Bentzon" chi su comunu at a arriciri e at a arregalai a is famìlias e a is disterraus.