S'istòria de Marco. Unu piciocu chi tenit su bisu de traballai in su campu de s'informàtica giurìdica

(In Tempus de crisi) - Casteddu, 22 de su mesi de làmpadas - Marco, classi 1981, a pustis de sa maturidadi issentifica si iscririt in sa facoltadi de Leis de s'Universidadi de is Istùdius de Casteddu, innoia, si contat, pigat sa laurea agoa de ai fatu unu caminu de istudianti meda trumentau. Su piciocu de Carbònia, difatis, si narat de essi stétiu vitima, in su 2012, de s'acuntéssia de su decadimentu de is istùdius chi at tentu comenti a protagonistas is istudiantis de s'ordinamentu béciu de s'ateneu casteddaiu. Mancai totu, Marco arrennescit a si pigai su tìtulu, chi dd'at fatu sunfriri meda, in su mesi de paschixèdda de s'annu passau. E allega allega de is punnas suas si pretzisat ca giai de primu de tenni su tìtulu connosciat is arrugas chi s'ant essi obertas: sa de sa pràtiga forensi e sa de is cuncursus in sa pùblica aministratzioni”, aundi, - si marcat - “apu giai fatu un'esperientziedda”. Sa laurea, s'acrarat su piciocu de Carbònia, m'at betiu a un'inghitzu nou. A su mamentu, difatis, fatzu sa pràtiga in d-un'istùdiu legali de sa tzitadi mia. A dolu mannu, perou, su tìtulu, tocat a ddu nai, m'at lassau puru afatallus mannus, intre is calis sa cultura scéti teòrica e càrriga de fresas mannas puru in matérias de importu”. A sa pregunta cali siant is arragus de is laureuas sardus, Marco s'arraspundit: “Sa crisi econòmica in Sardigna no ferrit scéti a is laureaus, ma a totus is sardus. Is problemas chi depint essi acaraus de calisisiat àteru laureau italianu innoi si faint intendi de prus po mori ca biveus in d-un'ìsula e po mori puru ca seus pagu genti.Donai s'inghitzu a propostas de importu, comenti sa circa, s'isvilupu e is investimentus chi ddis pertocat, bint un'iaxi de impeditzus e de allatzus. Totu custu si mudat in prus pagu bagas po su territòriu nostru, e in sa netzesidadi de s'istresiai de sa Sardigna”. Arrexonendi cun nos, Marco si contat puru de is progetus chi tenit po su tempus benidori suu: “S'idea – si marcat – iat essi sa de traballai in su campu de s'informàtica giurìdica e de sa pricacy online”, argumentus chi su piciocu de Carbònia at giai isboddiau in sa tesi de laurea. Ma – aciungit - “in prus de sa pràtiga e de s'esamu de istadu m'at a tocai a amaistrai. Perou, no m'apa a tancai àteras arrugas”.

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda