In Sardigna is turris de is costeras diventant Hotel de pompa. aMpI:"Frimaus sa distrossa"

(IlMinuto) – Casteddu, 3 de su mesi de làmpadas - In Sardigna is turris de is costeras funt istruturas fortaléssias assentadas ororu de su mari, chi in barigau teniant funtzioni de càstiu, defensioni e atacu, cun s'iscopu de preveniri e iscontriai possìbilis invasionis de su mari. In su tempus benidori, in sìsula, custas istruturas ant podi diventai hotel de pompa, restorantis e ofellerias. Su territòriu sardu tenit difatis 15 turris chi sa Regioni bolit "avalorai". S'idea de avaloramentu proposta de sa Ras no praxit perou a is indipendentistas de a Manca, chi in d-una nota de imprenta marcant: "sa natzioni nostra tenit unu patrimòniu istòricu, archeologicu, monumentali e artìsticu mannu mannu. Pecau chi siat de propriedadi de s'istadu italianu e no de su pòpolu sardu, e pecau chi s'istadu italianu apat determinau de ddu lassai in su discòidu e in s'arruina prus totali!". Po is indipendentistas de aMpI sa Ras tenit sa crupa manna de no bolli arresolvi custa situatzioni. A issa s'aciungit sa responsabilidadi de no bolli programai un'interventu de recùperu sériu po avalorai su patrimòniu monumentali de s'ìsula, pighendi aici manorberia e professionalidadis de su logu etotu. Su chi po sa Regioni est avaloramentu, po sa manca indipendentista est difatis scéti avrincu. Arremonendi s'artìculu 20 coma 1 de su decretu legislativu 42/2004 de su "Còdixi de is benis culturalis e de su paisàgiu" a Manca pro s'Indipendentzia afirmat ca "S'Itàlia e s'apendici regionali sua faint arraspetai is leis scéti candu custas permitint de suciai a su poòpolu sardu pofintzas su sànguni, candu funt ùtilis a ddis proibiri un'isvulupu econòmicu soberanu e diaderus produtivu e a arrajai sa lìngua e sa cultura sua. Ma candu is leis iant a podi essi impitadas po amparai su paisàgiu, difendi su patrimòniu e sa terra nostra de s'avrincu edilitziu, intzaras custas benint allogadas in su cadàsciu e iscarescias". Est in fortza de custu chi a Manca pro s’Indipendentzia s'impignat a poni in motu totus is "protzeduras", de tipu legali puru, po truessai su torrobu e sa distrossa de unu beni pùblicu chi est unicamenti e scéti de sa natzioni nostra".