Su cumitau no a su Progetu Lianora arraspundit a is sindacus. In s’ìnteris sa Martzia de sa Terra no si frimat
(IlMinuto) – Casteddu, 29 de su mesi de maju – "Su Progetu Lianora contra a su cali gherrat custu cumitau e totu sa populatzioni de sa Provìntzia de Aristanis de prus de un'annu previdit su pertusamentu de unu putzu àintru de unu tretu amparau, a 187 metrus de s'Oasi naturalistica de S’Ena Arrubia, e a prus de 400 metrus de is primus domus innoia bivint pipius chi tambeni no andant nimancu a iscola, a 600 metrus de unu campégiu turisticu" Est cantu afirmat su Cumitau Tzvicu No a su Progetu Lianora a pustis de essi benius a conoscèntzia de is dichiaras fatas a s'imprenta de is segretàrius regionalis de sa Filctem-Cgil, Femca-Cisl, Uiltec- Uil, Giacomo Migheli, Marco Nappi, Mario Cro asuba de su Progetu Lianora. "No podeus cumprendi a cali progetu de pertusamentu si relatant is rapresentantis sindacalis de Cgil, Cisl e Uil" difatis "No ddoi at nisciunu progetu de pertusamentu chi previdit unu putzu in su tretu industriali de Aristanis, aici comenti afirmant is rapresentantis sindacalis" e arremaciat: "capatzi chi [...] apant improddiau su Progetu Lianora cun d-un'àteru progetu de bogadura chi no conosceus, o chi no no ant nimancu obertu s'indixi de s'istùdiu de atumbidu ambientali [...] presentau de sa Saras S.p.A apitzus de su Progetu Lianora".Ma no est totu, su Cumitau marcat puru ca fueddai alladiau creat pregiudìtzius. In s’ìnteris sa Martzia de sa Terra no si frimat. A pustis de sa manifestada chi s'est isboddiada su 20 de su mesi de arbili passau in Arborea, est arribau su mamentu innoia tzitadinu e e Saras s'ant a cunfrontai. Su 30 de su mesi de maju, in s'Hotel Horse Country, a is 11.00, difatis, ddoi at essi s'istrutòria pùblica prevìdia de sa procedura de Valutatzioni de Atumbidu Ambientali. "In s'intrada de s'Hotel - iscrit in d-una nota de imprenta ProgReS Progetu Repùblica - eus a betiri su testu cun d-una mata de eras minori innoia dognunu de nos at ghetau su pròpriu sachiteddu de terra po simbolizai s'unioni de totus is comunidadis nostras in s'amparu de su territòriu sardu, po arremaciai sa boluntadi de podi ditzidi liberamenti apitzus de s'impitu de is risorsa de sa terra nostra".