Sa Regioni Sardigna abarrat agoa in s'amparu de sa lìngua a petus de sa Provìntzia de Bolzano. aMpi "Po cali arrexoni is Sardus iant depi pagai su canone Rai"

(IlMinuto) – Casteddu, 22 de su mesi de maju - Su dipartimentu po s'infuimatzioni e s'editoria de su Consillu de is Ministrus, sa Provìntzia de Bolzano e sa Rai ant firmau, in is diris passadas, un'acórdiu nou de tres annus, de su 2013 a su 2015,chi previdit su cumprimentu e sa distributzioni de argumentus in lìngua tedesca e ladina. Est sa primu bia chi s'acórdiu incluit sa Provìtzia de Bolzano puru, chi s'at a acollai is pesus acapiaus a serbìtzius de s'Istadu chentza trasladamentu de is funtzionis istatalis. Sa porposta si isboddiat in acatu a cantu prevìdiu de su puntu 5 de s'Acórdiu de Milano. Sa Provìntzia de Bolzano s'est acollada difatis, in sa mesura màssima, comenti narat s'artìculu 79, coma 1, lìtera c de s'Istatutu, is pesus chi pertocant is trasmitiduras in s'arràdiu e in sa televisioni in lìngua tedesca e ladina. Su, fatu e bòfiu de sa Provìntzia autónoma de Bolzano est unu passu mannu chi avalorat de meda is lìnguas de minoria. Unu determinu, cussu pigau de is aministradoris de su logu chi praxit a is indipendentistas de a Manca, chi cumentendi s'isceda afirmant: "una nova bella po is natzionis chentza de istadu obligadas a sutai a s'Itàlia" ma no est bella po nudda, - sighit sa nota de imprenta - "po is Sardus, no est bella po sa lìngua sarda, no est bella po sa natzioni nostra". "Difatis - sighit s'organizatzioni indipendentista de manca - s'annu chi benit is 'palinsesti' de sa Rai sarda ant a essi lintus e pintus a is de sèmpiri, est a nai totu o casi totus in lìngua italiana". Berus est ca sa Rai regionali no tenit unu telegiornali in sardu, e chi is médius chi teneus iant a fai unu traballu mannu impitendi su sardu po ddu avalorai comenti lìngua.Ma ita faint is polìticus chi funt in Regioni po mandai ainnatis unu progetu de importu mannu comenti su cojau de sa Provìntzia de Bolzano? Nudda. Una mudesa grai denuntziada puru de aMpI in su comunicau de imprenta: "sa citidura bipartisan - pretzisant - de totus is grupus chi funt in Regioni, incluius is chi dògnia diri si prenint sa buca cun fueddus comenti 'soberania' e aderetura 'indipendèntzia', cumentzendi de su gorvernadori Cappellacci e de is sardistas ex alliaus suus. No iat essi custu scéti un'avantzamentu in sa lota po su bilinguismu perfetu, ma iat essi puru una baga de no perdi po fai postus de traballu de importu mannu po tantis giòvanus giornalistas sardus". I est po custas arrexonis chi a Manca pro s’Indipendentzia si preguntat cali siat su motivu chi fait pagai a is Sardus su cànoni Rai "si sa lìngua nostra no benit amparada e antzis benit desintotu apubada a sa faci de is diritus arreconotus a is àteras lìnguas natzionalis chi s'agatant aintru de s'istadu italianu".