Arragus in s'iscola primària "Iqbal Masih" de Cuartu Sant'Alèni

(IlMinuto) – Casteddu, 27 de su mesi de maju - S'Ufìtziu territoriali de su Miur no acordat, po s'annu iscolàsticu 2013/2014, duas classis a Tempus prenu a s'iscola elementari "Iqbal Masih" de Cuartu Sant'Alèni. Custu at a causai - si ligit in sa nota de imprenta firmada de su Presidenti de su Consillu de Istitutu - "unu dannu meda grai a is famìlias e a is iscientis chi s'ant a biri liada un'oferta de imparu chi tenint diritu de tenni e chi furiat stétia pedia a su mamentu de s'iscritzioni". Un'assembrea, sa de arruga Inghirterra de genti determinada a difendi su diritu de is pròprius fillus e su diritu a su traballu, poita ndi liai su tempus prenu bolit nai creai arragus a famìlias innoia su babu e sa mama funt traballadoris e a ddus custringi a agatai un'iscola difarenti po is pròprius fillus, o a ddus obrigai a ddus mandai in d-un'iscola privada in d-unu mamentu de carestia manna. "Una bogadura - si ligit in su comunicau - chi, parrit no tengat nisciuna motivatzioni, si no sa de castigai unu bixinau, su de Pitz’e Serra, biu ca si tenint novas ca in àteras Istitutzionis Iscolàsticas, de sa Sardigna e de sa Provìntzia de Casteddu, totus is classis a tempus prenu [...] funt stétias cunfirmadas e ca in diversas àteras iscolas ndi siant stétias ativadas àteras chi no ddoi furiant s'annu passau". Is babus e is mamas de s'iscola elementari "Iqbal Masih" pedint chi si torrit agoa a petus de custa iscera disinténdia, e chi s'aministratzioni e is istitutzionis de sa tzitadi si fatzant càrrigu de betiri is arrechédius insoru, in is domus incarrigadas, po istraviai chi una solutzioni foras de contu si mudit in d-un'ingiustìtzia in is cunfrontus insoru