Termovaloritzadoris nous in Sardigna. Su no frimu de a Manca

(IlMinuto) – Casteddu, 24 de su mesi de gennàrgiu - Unu termovaloritzadori est praticamenti un'incinixadori de arrefudus capatzu de isfrutai s'energia prodúsia po ingendrai calori, callentai àcua e a sa finis fai energia elétrica. Chini acotzat a su cumprimentu de custus impiamtus, contra a is protestas de is tzitadinus cabosus de is dannus chi custus "mostrus" podint fai a sa saludi e a s'ambienti, no acrarat mai ca is termovaloritzadoris no iscabullint s'abentu de diossinas in is fumus de iscàrrigu lassaus in s'atmosfera . Est de unus cantu de diris fait su pragoni apretosu de su governadori de sa Sardigna Ugo Cappellacci chi determinat tempus crutzus meda po donai su cumentzu a su fàbricu de diversus termovaloritzadoris in Sardigna. S'impiantu de custus incinixadoris no parrit cumbinci a su presidenti de sa Provìntzia de Tàtari Alessandra Giudici, chi asuba de su tema at determinau s'installatzioni de una Mesa de consultatzioni territoriali ghiada de sa mantessi Provìntzia e costituia de is Comunus de su bacinu de Scala Erre e de su Cunsórtziu industriali provintziali. Prusaprestu, su cumprimentu de s'impiantu parrit cumbinci prus pagu de totus a s'organizatzioni política indipendentista a Manca pro s’Indipendentzia. Sa manca indipendentista, chi giai in àterus tempus s'est impignada a agiudai is lotas chi cumitaus e tzitadinus ant fatu contra a is incinixadoris e a is termovaloritzadoris, torrat a cabai in campu in difesa de sa Sardigna e de is Sardus. "Pentzaus [...] ca in Sardigna sa 'raccolta differenziata' depat arribai a su 90%, – si ligit in d-una nota de imprenta de a Manca - ma depat puru essi una baga de profetu e traballu comenti est in is Istadus prus tzivilis de su mundu". Po aMpI difatis is termovaloritzadoris no funt scéti impestadoris medas, ma faint parti de una " Tecnologia bécia chi is normas europeas previdint de remplassai intru de su 2020". "Is costus po fabricai a unu termovaloritzadori - sighit s'organizatzioni indipendentista - funt 6/7 bortas prus mannus de cussus chi iscrobant a fridu is 'solidi urbani', de is calis s'arrecabant matérias primas útilis po cumentzai is protzessus industrialis".

Fotografia de Slesia. Pigada de Flickr