Una batalla de Tzivilidadi. Su gestu estremu de su Comitau 16 totusantus

(IlMinuto) - Casteddu, 14 de su mesi de totusantus - "Su Guvernu at cuncodrau cun is reladoris in Comissioni Bilantzu una mudífica po sa "non autosufficienza" de 200 milionis no indiriztzaus, genéricus. Una limúsina, un'agràbiu, una bregúngia". Est cantu afirmat Salvatore Usala, boxi de su Comitau 16 totusantus. Desintotu abandonaus, is malàdius grais medas annuntziant unu gestu estremu. Est difatis normali ca s'abandonu de sa política sotziali dongat custus efetus scuncertantis e portit a is tzitadinus sanus e malàdius a s'apurimentu, fintzas a ddis fai fai caminus chentza de furriada, comenti su chi bolint fai is malàdius cun "tracheostomia", chi narant de essi prontus a morri in "diretta tv", candu su 21 de su mesi de totusantus chi benit s'ant a presentai in Roma a petus de su Ministeru de s'Ecunumia chentza de afantaladori de scorta po is prumonis. Sa retifica a su disignu de lei de istabilidadi, narat Usala, difatis, "no est bastanti": "No si bastat s'isciòpiru de su fàmini - sighit - boleis su mortu in 'diretta tv' i eis essi acuntentaus". Unu sceberu forti, unu gestu chentza furriada po abivai a su coru de unu Istadu ausenti. Is baterias de s'afantaladori po is prumonis poderant de is cincu a is ses oras, iscarighendusì ant a "arregalai" sa morti po arragu a chini cun balentia pretendit is próprius diritus. Seus a faci de una bera e própria acabada de Istadu.