"Pilastru de sa difesa": su maceddu de su pópulu palestinesu

(IlMinuto) – Casteddu, 19 de su mesi de totussantus - Galu una borta sa Tira de Gaza s'agatat abrancada de s'esértzitu israelianu. "Pilastru de sa difesa" est su nòmini chi Israeli at donau a s'operatzioni chi est cumentzada su 14 de su mesi de totussantus passau e chi est degogliendi a su pópulu palestinesu. Sa bivia de sa Palestina est un'àtera escalation de fúria chi ferrit chentza de asséliu a un'area destrossada annus fait de s'operatzioni militari batiada "Prumu Fundiu". Po chistionai de is acirradas israelianas in sa Tira de Gaza s'assótziu Sardigna Palestina e s'Unioni Democràtica Arabu Palestinesa - Udap aprontant po oi a is 18.00 un'atopu in sa domu de arruga Montesanto 28 in Casteddu. "Gaza ita fai?" est su títulu de sa proposta. "Esus a arrexonai de sa situatzioni chi est bivendi sa Palestina e de s'iscenàriu chi si proponit oindì a sa Comunidadi Internatzionali", si ligit in d-una nota de imprenta. Intre is iniziativass benientis, s'assótziu no proponit scéti una manifestada chi trisinit a totus is realidadis a cuncórdiu cun su pópulu palestinesu, ma un'atopu-dibàtidu puru, de s'isboddiai gióbia 22 de su mesi de totussantus a is 20.30 in sa domu de arruga Montesanto 28, cun sa proietzioni de su film "Làgrimas de Gaza" puru, de s'isvedesu Vibeke Løkkeberg. Una pellícula chi contat is istralias patias de sa genti palestinesa in s'ierru de su 2008-2009. "Pedeus chi a pigai parti a sa cosa siant in medas - concluit sa nota de imprenta - po mantèniri s'atentzioni arta asuba de is fatus de sànguini grais chi faint su maceddu sistemàticu de unu pópulu.