In Serrenti s'istúdiu "Féminas, traballu e família in sa Provìntzia de su Campidanu de Mesu"

(IlMinuto) – Casteddu, 10 de su mesi de ledàminis - "Féminas, traballu e família in sa Provìntzia de su Campidanu de Mesu". Est custu su títulu de s'istúdiu fatu de is istudiosas de s'Universidadi de Casteddu Maria Letizia Pruna e Sabrina Perra, chi at essi presentau in Teratru comunali de Serrenti cenàbara 12 de su mesi de ledàminis a is 16.00. S'avenimentu est cuncordau de s'assessorau a su Traballu e de s'Ofítziu de sa Consillera de Paridadi de sa Provìntzia de su Campidanu de Mesu cun s'agiudu de su Comunu de Serrenti. "Féminas, traballu e família in sa Provìntzia de su Campidanu de Mesu" - si ligit in d-una nota de imprenta - "est un'istrumentu de anàlisi e conoscéntzia de s'organizatzioni sótziu-económicu de su territóriu e de is andametus intre is mascus e is féminas". Seus ananti de su primu traballu de anàlisi issentífica de sa situatzioni de su Campidanu de Mesu. Unu spricullitu, su de Pruna e Perra, chi s'incuadrat asuba de un'istúdiu de su contestu demogràficu e apitzus de sa participatzioni de is féminas a su mercau de su traballu formali. A arrexonai de s'argumentu ant essi, in d-una mesa, is rapresentantis de is istitutzionis, is autoras de s'istúdiu, is rapresentantis sindacalis e de is assótzius e is traballadoras de su territóriu. A pustis de su dibàtidu s'at a isboddiai s'ispetàculu teatrali "Ungas e crisi", chi at essi postu in iscena de sa compagnia Cometa de Viviana. Una rapresentatzioni chi at a contai - cocluit sa nota de is aprontadoris - "istórias de féminas de su territóriu nostru, chi s'intrinciant casi chentza de cuscéntzia cun sa 'grande Storia' e funt isprigu de sa cunditzioni de sa fémina in sa sotziedadi contemporànea".