Ai liau su "sostegno" lesiat is diritus de is istudiantis disàbilis

(IlMinuto) – Casteddu, 8 de su mesi de ledàminis - "Ai liau càtredas noas de 'sostegno' a is maistus de rolu ispecialitzaus de parti de s'Ofítziu Iscolàsticu Provintziali de Casteddu arriscat de tenni arretumbus mannus no scéti asuba de is maistus ma prusatotu apitzus de is istudiantis disàbilis". Est cantu afirmat in d-una nota de imprenta Maria Grazia Caligaris, presidenti de s'assótziu Sotzialismu Diritus Reformas, agoa de essi stétia informada de diversus interessaus ca funt stétius fatas a is Ofítzius cumpetentis una fibera de denúntzias individualis chi at a acabai cun d-unu recursu colletivu a su Tribunali Aministrativu Regionali po no ai arrespetau is critérius po is disponibilidadis noas. Is critérius impitaus po cuncodrai is postus de "sostegno aggiuntivi" e is in "deroga" ant torrau a ponni in giogu s'orgànicu e duncas is assignamentus de is càtredas. "Custu est acontéssiu - acrarat Caligaris - in àterus Ofítzius Iscolàsticus ma no in su de sa Provìntzia de Casteddu aundi funt interessaus a su providimentu prus o mancu de 80 mistus ispecilitzaus de rolu". "Su mundu de s'iscola, chi tenit in aficàntzia a is inzénnerus giòvanus, pretendit - concluit sa presidenti de Sdr - cunsidériu prusatotu po is piciocus chi funt prus pagu fortunaus e chi bisant un'integratzioni cun s'agiudu professionali assegurau de sa lei asuba de su fundamentu de unu printzípiu costitutzionali".

Fotografia de alphakappa. Pigada de Flickr