Lissia e líburus, Casteddu oberrit is ennas a su Book Sharing

(IlMinuto) - Casteddu, 25 de su mesi de cabudanni - Po sa primu borta lompit in Sardigna su Book Sharing, líberu iscàmbiu de líburus intre tzitadinus: líburus chi no si serbint prus e líburus chi si bolint cundividi e contzillai. Su scàmbiu non s'at a tenni in is mureddas o in is pedríscias, ma in is parastàgius de una lavanderia self-service. Su bixinau Biddanoa de Casteddu e sa lavanderia Santu Giacu ant a acasagiai, difatis, a cumentzai de mérculis 26 de su mesi de cabudanni, is líburus de sa proposta "Piga unu líburu, lassa unu líburu". Nàscia de una bidea de su meri de s'atividadi, sa proposta inseurrat de su cuntzetu de filosofia culturali sustenìbili, lompia fintzas a innoni de is States. "Sa 'libreria' de sa lavanderia Santu Giacu - si ligit in d-una nota de imprenta - est oberta totu sa cida po seti diris, de is 8.00 de su mangianu a is 21.00 po podi pigai e lassai líburus". Po pigai parti a s'iscàmbiu de líburus, no funt prevìdias iscritzionis o tèsseras, ma est netzessàriu arraspetai su regulamentu prevìdiu chi si podit ligi in is aposentus de s'atividadi. "Sa formula est simpli e àxia - acrarat su meri - abetai chi bistiris, piumonis e lentzoru siat isciutaus e friscus de lissia cun d-unu bellu líburu intre is manus, setzius a discansu, est una manera intelligenti de impitai e de 'riciclare' su tempus e fai girai sa cultura".