Torrat in Casteddu s'International Summer Week

(IlMinuto) – Casteddu, 6 de su mesi de austu - Lompit ocannu a sa XV editzioni sua s'International Summer Week 2012, manifestada aprontada de s'assótziu casteddaiu tdm 2000 chi at a acabai su 10 de su mesi de austu chi benit. Gràtzias a s'avenimentu, in su mesi de austu sa Capitali de sa Sardigna aghillit a unu númeru bellu de giòvanus furesteris, chi ocannu funt 205 e lompint de 34 natzionis. Is piciocus ant essi protagonistas, impari a is aprontadoris, de sa proposta prus importanti de turismu coperativu interculturali de s'area de su mediterràneu. "Su meeting - si ligit in d-una nota de imprenta - durat una cida e in custa chi pigat parti a sa cosa tenit modu de connosci sa cultura sarda atressu de sa bisita a is logus prus significativus de s'ísula".