Istrobus mannus in Buoncammino: basca tòrrida po 570 presoneris

(IlMinuto) – Casteddu, 9 de su mesi de austu - Arribat a 570 su númeru de presoneris inserraus in su presoni casteddaiu de Buoncammino. Amentaus ca s'istitutu de pena podit acasagiai unu númeru màssimu de 345 personis. Sa preséntzia manna de presoneris no agiudat sa situatzioni de s'istrutura penitentziària, chi - afirmat Maria Grazia Caligaris, presidenti de s'assótziu Sotzialismu Diritus e Reformas - bit "un'aumentu preocupanti de atus de 'autolesionismo' po mori de su 'sovraffollamento'". "A su númeru esagerau de preséntzias aintru de is cellas - si pretzisat in sa nota de imprenta - tocat aciungi sa basca allupadora de custas diris chi amenguat e inzenerat unu stadu de nervosu costanti. Is presoneris funt custrintus a fai filas longas po intrai a is dócias e in unus cantu de areas s'àcua chi bessit de su grifoni est tébida". Una situatzioni est tràgica prusatotu poita in s'istitutu penitentziàriu s'agatant diversus antzianus cun maladias crónicas a s'"apparato respiratorio e cardiovascolare", presoneris in dópia diàgnosi cun istrobus a conca e drogaus "in trattamento".

"Su Dipartimentu de s'Aministratzioni Penitentziària - afirmat sa presidenti de Sdr - no podit sighiri a trasferiri in su presoni de Casteddu tzitadinus privaus de sa libertadi chi lompint de sa Penísula cun s'iscopu de ddus isolai e negai imbecis a is sardus de podi torrai acanta de is parentis chi po su prus no bint de annus meda. Funt mesuras castigadoras, chi s'aciungint a is penas e chi funt contràrias a su beni de sa genti".

Fotografia de chrisssss. Pigada de Flickr